Ulttyq parktegi fototuzaqtar qalaı ornatylady
Elimizde jabaıy janýarlardy zertteý men baqylaý úshin ulttyq parkterde fototuzaqtar ornatylady. Jasyryn kameralardyń arqasynda Qyzyl kitapqa engen janýarlardyń sırek kadrlary alynady. Kólsaı kólderi ulttyq parki dırektorynyń orynbasary Hamıt Ahmetovtyń aıtýynsha, fototuzaqtardy parktiń arnaıy daıyndalǵan ınspektorlary ornatyp, sheship alady.
- Bizde ulttyq park dırektorynyń buıryǵymen beınetuzaqtardy ornatý jáne aýystyrý boıynsha 2024-2025 jyldarǵa jumys jospary bekitilgen. Sol boıynsha sırek kezdesetin janýarlardyń júrý joldary anyqtalǵannan keıin fototuzaqtar ornatylady. Olardy Janýarlardy molaıtý jáne qorǵaý bóliminiń mamandarymen birge ınspektorlar birlese otyryp beınetuzaqtardy aýystyryp otyrady. Búgingi kúni park aýmaǵynda 37 fototuzaq ornatylǵan, - dedi ol.
Sondaı-aq ulttyq park ókili fototuzaq alynǵannan keıin ishindegi kadrlar óńdelip, Zoologııa ınstıtýtyna jiberiletinin atap ótti.
- Fototuzaq onlaın rejımde jumys istemeıdi. Inspektor onyń ishindegi fleshkany ákelgennen keıin keńsede kadrlar óńdep, irikteledi. Sebebi ishinde myńdaǵan kadr bolady. Bir qar barysy on ret túsýi múmkin. Sosyn kadrlardy Zoologııa ınstıtýtyna jiberemiz, - dedi Hamıt Ahmetov.
Jalpy Orman sharýashylyǵy jáne janýarlar dúnıesi komıtetiniń málimetinshe, elimizdiń ulttyq parkterinde 400-ge jýyq fototuzaq ornatylǵan.
Eske salaıyq, buǵan deıin Kólsaı kólderinde kúshikterin ertken qar barysy fototuzaqqa túsip qalǵanyn jazǵanbyz.
Oǵan deıin Kólsaı kólderi ulttyq tabıǵı parkinde qar barysy men Túrkistan sileýsini fototuzaqqa túsip qalǵan edi.