Ulttyq mýzeıde «Dúnıe dıdaryndaǵy Dımash» kórmesi ashyldy
Kórme, Dımashtyń Astanadaǵy aýqymdy kontsertine oraılastyrylyp, onyń ónerdegi jetistikteri men shyǵarmashylyq jolyna arnalǵan mańyzdy mádenı keńistik retinde uıymdastyryldy.
Bul kórmeniń maqsaty — kórermenderge Dımash Qudaıbergenniń ómiri men shyǵarmashylyǵyndaǵy mańyzdy sátterdi kórsetý, onyń ulttyq jáne halyqaralyq deńgeıde qol jetkizgen jetistikterin aıqyndaý. Ekspozıtsııanyń negizgi bólimi ártistiń jeke zattary, sahnalyq ómirine qatysty qundy jádigerler men álemdik mádenıetke qosqan úlesin aıqyndaıtyn eksponattardan turady.
Kórmeniń ashylý saltanatyna álemniń 50-den asa elinen kelgen kórermender qatysty, olardyń qatarynda Qytaı, AQSh, Kanada, Reseı jáne basqa elderdiń ókilderi boldy.
Qazaqstan Respýblıkasynyń Mádenıet jáne aqparat mınıstri Aıda Balaeva ashylý saltanatynda arnaıy hat joldap, Dımash Qudaıbergenniń qazaq mádenıetin álemge tanytýdaǵy rólin atap ótip, jankúıerlerine alǵysyn bildirdi. Mınıstrdiń hatyn mádenıet komıtetiniń tóraǵasy Kúmis Qarsaqbaıqyzy Seıitova oqyp berdi, hatta Dımashtyń shyǵarmashylyǵy elimizdiń ulttyq óneri men mádenıetin jańa deńgeıge kótergeni atap ótildi.
Sondaı-aq, Aqtóbe oblysynyń ákimi de óz quttyqtaý hatyn joldady, bul hatty oblystyń ishki saıasat basqarmasynyń basshysy Álibek Muqtaruly Baıneshov oqyp berdi. Ákim óz hatynda Dımashtyń týǵan jeriniń maqtanyshy ekenin jáne onyń álemdik arenadaǵy jetistikteri Aqtóbe óńiri úshin úlken mártebe ekenin atap ótti.
Kórmeniń ashylý saltanatynda Dımashtyń ákesi, QR mádenıet qaıratkeri, ánshi, kompozıtor Qanat Aıtbaev da sóz sóılep, jankúıerlerdiń árdaıym qoldaý bildirgenine shynaıy alǵysyn bildirdi. Ákesiniń aıtýynsha, mýzyka men mádenıet shekara tańdamaıdy ári adamdardy biriktiretin kúshke ıe. Sondaı-aq, Qanat Aıtbaev jankúıerlerdiń qoldaýy men yqylasy Dımashtyń óner jolyndaǵy eń basty motıvatsııalardyń biri ekendigin basa aıtty.
Sonymen qatar, jankúıerler atynan sóz sóılegen Kanadadan kelgen Chjao hanym Dımashtyń shyǵarmashylyǵy men tulǵasyna degen mahabbatyn jetkizip, búkil álemdegi jankúıerlerdiń onyń ónerine degen shynaıy yqylasyn bildirdi. Chjao hanymnyń sózi kórermender tarapynan zor qoldaý tapty.
Al Gonkongte týǵan, qazirgi ýaqytta Norvegııada turatyn Dımashtyń Catherine esimdi jankúıeri Qazaqstanǵa alǵash ret kelipti.
«Dımashtyń arqasynda men Qazaqstandy tanydym, osy eldiń mádenıeti men dástúrlerine degen qyzyǵýshylyǵym arta tústi. Bul - meniń Qazaqstanǵa alǵash ret kelýim. Qazaqstan halqynyń qonaqjaılylyǵy men meıirimdiligi maǵan zor áser qaldyrdy», – deıdi ol.
Dımashtyń anasy, tanymal ánshi Svetlana Aıtbaevanyń aıtýynsha, qytaılyq jankúıerler qashan da belsendi.
«Dımash Qytaı elinen kóp nárse úırendi, muny ózi de úlken rızashylyqpen únemi aıtyp júredi. Dımash qaı jerde kontsert ótkizse de, Qytaıdaǵy kóptegen jankúıer árqashan oǵan qoldaý kórsetedi. Biz olarǵa erekshe alǵysymyzdy bildiremiz», – dedi ol.
Kórmede birneshe taqyryptyq bólimder usynyldy:
- «Shabyt kózderi» — ártistiń balalyq shaǵy, ósken ortasy jáne shyǵarmashylyq damýyn beıneleıtin fotosýretter men zattar;
- «Dańqqa aparar jol» — onyń kásibı bilim jolyndaǵy dıplomdary men túrli respýblıkalyq jáne halyqaralyq baıqaýlarda alǵan marapattary;
- «Jankúıerler mahabbaty» — álemniń túkpir-túkpirinen ártiske joldanǵan jankúıerlerdiń syılyqtary;
- «Ult mádenıetiniń jarshysy» — ulttyq mádenıet pen qazaq óneriniń álemdik arenada tanylýyna yqpal etetin Dımashtyń ulttyq aspaptary men ulttyq kıimderi.
Aıta keteıik, 13-14 qyrkúıek kúnderi Dımash Qudaıbergen Astanada eki kún qatarynan jeke kontsertin beredi. Biregeı shoýdy tamashalaýǵa 50 elden kórermender keledi dep kútilip otyr.