Ulttyq quryltaı memleket pen qoǵam arasyndaǵy basty dıalog alańyna aınaldy — Memkeńesshi

<p>ASTANA. KAZINFORM — Memlekettik keńesshi Erlan Qarın «24.kz» telearnasyna bergen suhbatynda Ulttyq quryltaıdyń qyzmeti jóninde aıtyp, onyń memleket pen qoǵam arasynda tikeleı dıalog ótip jatqan basty alań ekenin atap ótti. Bul rette dıalog tek quryltaı otyrystarynda ǵana emes, jyl boıy júredi. Quryltaı músheleri aıtylatyn bastamalardy jyl boıy pysyqtaıdy.</p>

Memlekettik keńesshi Ulttyq quryltaı qyzmetiniń keıbir aspektileri týraly aıtyp berdi.

«Ár otyrystan keıin jumys jospary qabyldanady. Máselen bıylǵy naýryz aıynda Atyraý qalasynda ótken Ulttyq quryltaı otyrysynyń qorytyndysy boıynsha josparlanǵan 9 zańnyń beseýi qabyldandy», — dep atap ótti Erlan Qarın.  

Qabyldanǵan bes zań: 

— Áıel quqyqtary men balalardyń qaýipsizdigin qamtamasyz etý máseleleri jónindegi zań; 
— Oıyn bıznesi jáne oıynǵa táýeldilikpen kúresý máseleleri boıynsha zańnamalyq túzetýler;
— Esirtki óndirýdi jáne satýdy uıymdastyrǵany úshin qylmystyq jaýapkershilikti kúsheıtýge baǵyttalǵan túzetýler; 
— elektrondyq tutyný júıelerin (veıpterdi) ákelýge, óndirýge, satýǵa jáne taratýǵa zańnamalyq tyıym salý;
— Onomastıka jáne geraldıka salasyndaǵy jumysty jetildirý jáne ortalyqtandyrý jónindegi túzetýler.

Olar atalǵan salalardaǵy rásimderdi aıtarlyqtaı naqtyraq retteıdi.

Sonymen birge, Erlan Qarın Ulttyq quryltaıdyń jumysy tek zań jobalaý qyzmetimen ǵana shektelmeıtinin jetkizdi.

Máselen, bıylǵy maýsym aıynda 2024-2026 jyldarǵa arnalǵan zańsyz oıyn bıznesi men lýdomanııaǵa qarsy is-qımyldyń keshendi jospary qabyldandy.