Ulttyq qorǵanys ýnıversıtetin támamdaǵan ofıtser magıstrlerge dıplom tabystaldy
Atalmysh joǵary áskerı oqý orny jyl saıyn «Qarýly kúshter Bas shtabynyń akademııasy» fakýltetinde jedel-strategııalyq jáne strategııalyq deńgeıdegi basqarý mamandaryn daıyndap shyǵarady.
Magıstranttardy quttyqtaýǵa Qorǵanys mınıstriniń birinshi orynbasary – QR QK Bas shtabynyń bastyǵy general-leıtenant Sultan Qamaletdınov keldi. Ol munda ofıtserlerdiń, bolashaq áskerbasylardyń jáne áskerı basqarý organdary basshylarynyń jańa pleıadasy daıyndalyp jatqanyn atap ótti.
– Egemen Qazaqstan Qarýly kúshteri qurylǵan alǵashqy kúnnen bastap normatıvtik-quqyqtyq bazany qalyptastyrýmen, uıymdyq-shtattyq qurylymdy ońtaılandyrýmen jáne áskerlerdi tehnıkalyq jaraqtandyrýmen qatar, áskerı kadrlardy daıyndaýdyń kóp deńgeıli júıesin qurý basym baǵyt bolǵanyn atap ótken jón. Bul qadam búginde ózin tolyq aqtady deýge negiz bar. Ulttyq qaýipsizdikti qamtamasyz etýde adam áleýetine erekshe mańyz berilgen, – dedi general-leıtenant Sultan Qamaletdınov.
Qorǵanys mınıstriniń birinshi orynbasary el Prezıdenti – Joǵarǵy Bas qolbasshy Qasym-Jomart Toqaev Qarýly kúshterdiń odan ári damýyna basa nazar aýdaratynyn atap ótti.
– Bizge basqarý júıesin jańǵyrtý, qazirgi zamanǵy qarýly qaqtyǵystardyń tájirıbesin eskere otyryp, áskerlerdiń jaýyngerlik ázirligi men jaýyngerlik qabiletin arttyrý, materıaldyq-tehnıkalyq bazany jetildirý, robottandyrý men jasandy ıntellektini engizýmen aınalysý kerek.Armııanyń kadrlyq áleýetin nyǵaıtýdaǵy Ulttyq qorǵanys ýnıversıtetiniń róline toqtalǵanda, munda biregeı ǵylymı-zertteý jáne bilim berý ortasy qurylǵanyn da aıtý kerek, – dep jalǵastyrdy Bas shtab bastyǵy.
Ol sondaı-aq aldaǵy ýaqytta da UQÝ-nyń damýy jalǵasatynyn, kelesi oqý jylynan bastap jańa kafedralar, fakýltetter men zerthanalar ashylatynyn aıtty. Sonymen birge magıstranttar men doktoranttarǵa arnalǵan bilim berý baǵdarlamalary men pánder jelisi de keńeıtilmek.
General-leıtenant Sultan Qamaletdınov professorlyq-oqytýshylar quramyna, ǵylymı qyzmetkerlerge alǵysyn bildirdi. Qazaqstan armııasynyń qatary eń bedeldi áskerı oqý ornynda bilim alǵan joǵary bilikti mamandarmen tolyǵatynyn jáne túlekterdiń aldynda ofıtserler korpýsynyń bedelin joǵary deńgeıge kóterý mindeti turǵanyn jetkizdi.
Bıyl memlekettik attestattaý komıssııasynyń sheshimimen 158 túlekke Ulttyq qaýipsizdik jáne áskerı ister magıstri dárejesi berildi. Ofıtserler magıstratýranyń bilim berý baǵdarlamasyna sáıkes teorııalyq oqytý men áskerı taǵylymdamanyń tolyq kýrsynan sátti ótti. 9 mamandyq pen 22 biliktilik boıynsha Memlekettik attestattaý komıssııasy júrgizgen qorytyndy attestattaý barysynda joǵary bilimderin kórsetti.
Bıyl magıstratýrany «Áskerı istegi strategııalyq menedjment» baǵdarlamasy boıynsha 8 ofıtser bitirdi. Olardyń qatarynda polkovnık Murat Júsipov oqýyn úzdik aıaqtaǵanyn atap ótý kerek.
Oqýdyń barlyq kezeńinde óte jaqsy bilimin kórsetip, qorytyndy attestattaýdy tek «óte jaqsy» baǵaǵa tapsyrǵan oqý úzdikteri qatarynda jan-jaqty qamtamasyz etý fakýltetiniń túlekteri podpolkovnık Dıas Qanafın men maıor Ivan Bıtıýkov ta bar. Aıta ketý kerek, oqýdyń barlyq kezeńinde «óte jaqsy» degen baǵa alyp, qorytyndy attestattaýdan «óte jaqsy» ótken magıstranttarǵa tósbelgi berilip, olardyń aty-jóni oqý ornynyń Qurmet taqtasyna jazylady.
Ulttyq qorǵanys ýnıversıteti jedel-strategııalyq jáne jedel-taktıkalyq basqarý býyndaryna ofıtserler daıyndaıdy. Sonymen qatar bul bilim ordasy vedomstvoaralyq ǵylymı-bilim berý ortalyǵy bolyp tabylady, ári magıstratýranyń bilim berý baǵdarlamalary boıynsha Qazaqstannyń basqa áskerleri men áskerı quralymdary úshin kadr daıyndaýdy júzege asyrady. Bıylǵy jyly bul oqý ornyn Ulttyq ulannnyń 23 áskerı qyzmetshisi, UQK Shekara qyzmetinen 14 adam jáne Tótenshe jaǵdaılar mınıstrliginen 5 adam bitirip shyqty.
Ýnıversıtette UQShU-ǵa múshe memleketterdiń ofıtserleri de turaqty negizde oqyp, bilim alady. Búgingi shyǵarylymda Tájikstan Respýblıkasynyń 16, Qyrǵyz Respýblıkasynyń 4 áskerı qyzmetshisi baryn aıta ketý kerek.