Ulttyq qorǵa túsetin qarjydan, alynatyn soma asyp ketip otyr – Tımýr Súleımenov
«Ulttyq qorǵa qarajattyń túsýi men ony alýda teris balans bar. Qordan alynǵan qarajat onyń túsiminen asyp ketip otyr. Bul jaǵdaıda Ulttyq qor qarajatyn kóbeıtetin jalǵyz faktor – ınvestıtsııalyq kiris. Bıyl toǵyz aıda 10,27% nemese 6,16 mlrd dollar boldy. Sol arqyly Ulttyq qordyń aktıvteri jyl basynan beri 4,5%-ke ósip, 62,7 mlrd dollarǵa jetti», - dedi Tımýr Súleımenov Májilistiń jalpy otyrysynda 2025-2027 jyldarǵa arnalǵan respýblıkalyq bıýdjetti talqylaý barysynda.
Ulttyq bank tóraǵasy bergen málimetke súıensek, Ulttyq qordan beriletin tikeleı transfertter kólemi 5,6 trln teńgege jetken.
«Ulttyq qordan alynatyn tikeleı transfertter men basqa alymdar kóleminiń massasy shamamen 16%-ǵa jetti. Bul áleýmettik ósimmen qosa, valıýta naryǵyna qysym kórsetedi, ıaǵnı valıýta baǵamyn burmalaıdy. Sonymen qatar otandyq bızneske kedergi keltiredi, ekonomıkanyń «gollandtyq aýrýǵa» shaldyǵýyna ákep tireýi múmkin. Bul – proınflıatsııalyq faktor, sondyqtan da monetarlyq saıasatymyzdy tezirek jeńildetýge, bazalyq mólsherlemeni jáne bank kredıtterin, bıznes boıynsha kredıttik mólsherlemeni tómendetýge múmkindik bermeı otyr», - dep tolyqtyrdy T. Súleımenov.
Odan bólek, Ulttyq bank basshysy qazir Parlamentte salyq kodeksi qaralyp jatqanyn aıta kele, jańa kodekstiń bıýdjet kirisin arttyrý úshin júıeli sharalar qabyldaý jolynda mańyzdy qural ekenin tilge tıek etti.
Buǵan deıin Ulttyq bank tóraǵasy Tımýr Súleımenov 2025 jylǵy ınflıatsııa dınamıkasyna qatysty túsinik berdi.