Ulttyq qordan 1,1 mlrd AQSh dollary satylady

<p>ASTANA. KAZINFORM &ndash; Respýblıkalyq bıýdjetke transfertter bólýge Úkimettiń aldyn ala boljamdy ótinimderi boıynsha sáýirde Ulttyq bank Ulttyq qordan 1,1 mlrd AQSh dollaryna deıingi mólsherde valıýta satýdy kózdeıdi. Bul týraly Ulttyń banktiń baspasóz qyzmeti málim etti.&nbsp;</p>

Naýryz aıynyń qorytyndysy boıynsha, teńge baǵamy 0,9%-ǵa nyǵaıyp, 1 AQSh dollary 446,77 teńgege deıin qalyptasqan. Qazaqstan qor bırjasynda saýda-sattyqtyń ortasha kúndik kólemi bir aıda 187 mln AQSh dollarynan 225 mln AQSh dollaryna deıin ulǵaıǵan. Saýda-sattyqtyń jalpy kólemi - 3,8 mlrd AQSh dollary. 

«Ulttyq qordan respýblıkalyq bıýdjetke transfertterdi qamtamasyz etý úshin naýryzda 748 mln AQSh dollaryna valıýta satyldy. Ulttyq qordan satý úlesi jalpy saýda-sattyq kóleminiń 19%-yn jáne kúnine 44 mln AQSh dollarynan aspaıtyn mólsherdi qurady. Ulttyq Bank Ulttyq qordyń qarajatymen operatsııa júrgizý kezinde naryqtyń beıtarap qaǵıdatyn saqtaıdy. Bul shetel valıýtasyn udaıy jáne birkelki satýdy bildiredi. Bul tájirıbe Ulttyq qordaǵy operatsııalardyń valıýta naryǵyna áserin barynsha azaıtýǵa múmkindik beredi», - dep habarlady Ulttyq bank. 

Ulttyq Bank naýryzda BJZQ zeınetaqy aktıvteriniń valıýtalyq úlesin 30% deńgeıinde ustap turý maqsatynda bırjadaǵy saýda-sattyqta shetel valıýtasyn satyp alýdy jalǵastyryp otyr. Onyń jalpy somasy - 500 mln AQSh dollary nemese naryqtyń jalpy kóleminiń shamamen 13%-y.

Ulttyq Banktiń málimetinshe, naýryzda valıýtalyq ınterventsııalar júrgizilgen joq.

Respýblıkalyq bıýdjetke transfertter bólýge Úkimettiń aldyn ala boljamdy ótinimderi boıynsha Ulttyq qordan 1-1,1 mlrd AQSh dollaryna deıingi mólsherde valıýta satý josparlanǵan. Sondaı-aq BJZQ zeınetaqy aktıvteriniń valıýtalyq úlesin ustap turý úshin 450-500 mln AQSh dollaryna deıingi mólsherde valıýta satyp alý kózdeledi. 

Ulttyq Bank ashyqtyq qaǵıdaty aıasynda valıýta naryǵynda júrgiziletin barlyq operatsııa týraly aqparatty tolyq ashyp kórsetedi. Qysqamerzimdi perspektıvada teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty túrlenedi.

Ulttyq Bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi.