«Ulttyq qor - balalarǵa»: Bala 18 jasqa tolǵannan keıin shottaǵy qarajaty 10 jyl saqtalady

<p>Ulttyq qordyń ınvestıtsııalyq tabysynan aýdarylatyn qarajat bala 18 jasqa tolǵannan keıin 10 jyl shotynda saqtalady. Bul týraly Qarjy vıtse-mınıstri Dáýren Temirbekov Ortalyq kommýnıkatsııalar qyzmetindegi baspasóz máslıhatynda aıtty, dep habarlaıdy Kazinform.</p>

«2023 jylǵy 1 qazandaǵy resmı derekter boıynsha eldegi 18 jasqa deıingi balalardyń jalpy sany shamamen 7 mln adamdy qurap otyr. Parlament qabyldaǵan Zańǵa sáıkes Ulttyq qordyń ınvestıtsııalyq tabysynyń 50 paıyzyn 18 jasqa deıingi barlyq jastaǵy balalar arasynda teń bólý kózdelgen. Ulttyq qor qarajatyn bilim alýǵa jáne turǵyn úı jaǵdaıyn jaqsartýǵa baǵyttalǵan naqty eki maqsatta paıdalaný usynylady. Bilim alý baǵyty boıynsha qarajatty joǵarǵy oqý oryndarynyń aqysyn tóleýge nemese memlekettik bilim berý jınaqtaý júıesine aýdarýǵa múmkindik beriledi. Sheteldik oqý ornynda oqý aqysyn tóleýge qarajatty paıdalaný shektelmeıdi», - dedi vıtse-mınıstr.

Onyń atap ótýinshe, turǵyn úı jaǵdaıyn jaqsartý baǵyty boıynsha qarajatty tek Qazaqstan Respýblıkasy aýmaǵynda ǵana paıdalanýǵa ruqsat etiledi. Sonymen qatar, bul qarajatty bastapqy jarna, ıpotekalyq qaryzdar boıynsha tólem retinde aýdarýǵa múmkindik beriledi.

«Qazaqstan Respýblıkasynyń azamattary 18 jasqa tolǵanǵa deıin – «Qatysýshylar» bolyp esepteledi, kámeletke tolǵannan keıin – «Alýshylar» sanatyna kóshedi. 18 jasqa tolǵan kezde jınaqtalǵan qarajat balanyń aıryqsha menshigi bolady. Ýákiletti operatorlarǵa ótinish bergennen jáne shot ashqannan keıin jınaqtalǵan qarajat kórsetilgen shotqa aýdarylady.

Sondaı-aq, alýshylar retinde zańdy ókilder men muragerler de bola alady. Bala 18 jasqa tolǵannan keıin shottaǵy qarajat 10 jyl boıy saqtalatyn quqyq beriledi. Shottaǵy qarajat 10 jyl ishinde talap etilmegen jaǵdaıda, sol adamnyń zeınetaqy shotyna aýdarý múmkindigi bar. Qazaqstan Respýblıkasy azamattyǵyn joǵaltqan kezde tólemderge talap qoıý quqyǵy da joıylady», - dedi Dáýren Temirbekov.