Ulttyq ıdeologııanyń jańa baǵdary
«Búgin Atyraý qalasynda Prezıdentimiz Qasym-Jomart Kemeluly Toqaevtyń tóraǵalyǵymen Ulttyq quryltaıdyń úshinshi otyrysy ótti. Dástúrge aınalǵan keleli keńestiń kezekti jıynynda ıdeologııa salasynda júrgiziletin keshendi jumystyń naqty baǵyt-baǵdary aıqyndaldy. Bul qazirgideı jahandaný kezeńinde tarıhı tamyrdan ajyramaı, ulttyń ózindik kelbetin saqtaý qalý úshin asa mańyzdy qadam ekeni anyq. Shyn máninde, eldiń ósip-órkendep, ozyq memleketterdiń qataryna qosylýy úshin ekonomıkalyq jetistikter azdyq etedi. Bul rette halyqtyń biregeıligin aıshyqtaıtyn qundylyqtar aıryqsha mańyzǵa ıe. Memleket basshysy Quryltaıda osy máselege basa nazar aýdardy»,-dedi Máýlen Áshimbaev.
Sondaı-aq ol sózinde prezıdentimiz óz sózinde bul baǵyttaǵy birqatar máselege toqtalǵanyn atap ótti.
Sonyń ishinde qoǵamdaǵy bereke-birlikti saqtaý eldikti nyǵaıtý jolyndaǵy negizgi mindetterdiń biri ekenin aıtty. Memleket basshysy atap ótkendeı, osy iste zııaly qaýymǵa aıryqsha jaýapkershilik júkteledi. Rasymen, aǵa býynnyń aýyzbirshiligi tutas eldiń yntymaǵyna áser etetini sózsiz.
Quryltaıda memlekettik tilge qatysty másele de nazardan tys qalǵan joq. Prezıdentimiz qazaq tiliniń ǵylym tiline aınalyp kele jatqanyn jáne tilimizdiń qoldaný aıasyn keńeıte túsý memlekettik saıasattyń basty baǵyty bolyp qalatynyn aıtty. Bul iste kreatıvti ındýstrııanyń mańyzy erekshe. Osyǵan oraı aldaǵy ýaqytta atalǵan saladaǵy keshendi jumystar jalǵasa beredi.
Sondaı-aq Memleket basshysy qoǵamda kitap oqý mádenıetin ornyqtyrý úshin Quryltaı músheleriniń Ulttyq kitap kúnin belgileý týraly usynysyna qoldaý bildirip, ony mazmundy ári nátıjeli ótkizý kerektigin aıtty.
Eldiń ıdeologııalyq keńistigin keńeıtý jolynda mádenı murany saqtaý, tól tarıhymyz ben kórnekti tulǵalarymyzdy dáripteý isi de basymdyqqa ıe. Sol sebepti Prezıdentimiz bıyl Joshy ulysynyń negizi qalanǵanyna 800 jyl tolyp otyrǵanyn nazarǵa alyp, elimizdi álemge tanytý úshin Altyn Orda brendin jan-jaqty jáne keńinen paıdalaný qajet ekenin atap ótti.
Ulttyń jańa sapasyn qalyptastyrý jolynda jaǵymsyz ádetterden arylýdyń mańyzy zor. Qazirgi tańda túrli úrdisterge baılanysty qoǵamǵa qaýipti jańa keselder paıda bolǵany belgili. Memleket basshysy osy máselege erekshe toqtalyp, esirtki saýdasy, lýdomanııa, turmystyq zorlyq-zombylyq, býllıng pen agressııa, vandalızm jáne ysyrapshyldyq sııaqty eldiń irgeli jyljýyna tusaý bolatyn dertterge tosqaýyl qoıý kerektigin aıtty.
Qasym-Jomart Kemeluly ult tamyryna balta shabatyn mundaı ádetterden túbegeıli qutylý úshin zańdy kúsheıtip, jazany qataıtyp, batyl qadamdar jasaý qajet ekenin atap ótti.
Sonymen qatar Prezıdentimiz ulttyń jańa kelbetin aıqyndaıtyn negizgi qundylyqtarǵa da toqtaldy. Olar: Táýelsizdik jáne Otanshyldyq, Birlik jáne Yntymaq, Ádildik jáne Jaýapkershilik, Zań jáne Tártip, Eńbekqorlyq jáne Kásibı biliktilik, Jasampazdyq jáne Jańashyldyq.
Elimizde jalpyulttyq qundylyqtar júıesin bekitý, qoǵamda jańa etıka qalyptastyrý, Prezıdentimiz aıtqan «Adal azamatqa» laıyqty urpaq tárbıleýde atalǵan qaǵıdalar negizgi baǵyt bolary anyq.
«Sondyqtan Memleket basshysy aıqyndap bergen jańa ıdeologııalyq baǵdar aıasyna búkil qoǵam bolyp toptasyp, jańa mindetterdi iske asyrýda judyryqtaı jumylýymyz kerek. Bul rette Parlament, onyń ishinde Senat zańnamalyq baǵyttaǵy jumysty sapaly ári ýaqytyly júrgizýge daıyn ekenin atap ótkim keledi. Aldaǵy ýaqytta halqymyz osy baǵytta birlik pen Prezıdentimiz aıtqan «Adal adam – Adal eńbek – Adal tabys» úsh taǵanyna taban tirep áreket etse, ozyq oıly ult bolyp qalyptasatyny sózsiz. Sol sebepti, barshańyzdy eldikti nyǵaıtatyn iske beıjaı qaramaı, belsendilik tanytýǵa shaqyramyn»,-dedi Senat tóraǵasy.