Ulttyq ǵylym akademııasy otandyq ǵylymdy qalaı damytady
2022 jyly Qazaqstannyń Ulttyq ǵylym akademııasynyń 75 jyldyq mereıtoılyq sessııasynda Prezıdent Qasym-Jomart Toqaev akademııaǵa memlekettik mártebe berip, rólin arttyrýdy tapsyrǵan bolatyn. Ótken aıda QR Ulttyq ǵylym akademııasynyń jańa basshysy laýazymyna Aqylbek Kúrishbaev taǵaıyndaldy.
«Qazir ǵylymı qoǵamdastyqta «Qazaqstandyq ǵylymdy damytýda Prezıdent janyndaǵy jańadan qurylǵan Ulttyq ǵylym akademııasy qandaı ról atqarady?» degen saýal oryndy qoıylyp otyr.Biz eń aldymen, ejelden qalyptasqan ǵylymdy basqarý júıesin teńseltip alýdan saqtanýymyz keregin túsinýimiz qajet. ıAǵnı, bul arada akademııa ǵylymı mekemelerdi bir vedomstvodan ekinshisine aýystyryp, tek nusqaý beretin ekinshi memlekettik ýákiletti organǵa aınalmaýy kerek. Qazirgi jańarǵan akademııanyń ózindik biregeı mıssııasy bar, ol ǵylymdy basqarý salasynda ketken júıeli olqylyqtardyń ornyn toltyrýdy kózdeıdi», - dedi Aqylbek Kúrishbaev Nazarbayev University ǵımaratynda ótken kezdesýde.
Onyń aıtýynsha, akademııanyń jańa mıssııasynyń negizin quraıtyn birneshe alǵysharttar bar: otandyq jetekshi ǵalymdardyń kúsh-jigerin bir arnaǵa biriktirý, QR ǵylymı-tehnıkalyq damý baǵyttaryn barlyq múddeli taraptardyń syndarly talqylaýy úshin jaǵdaı jasaý.
«Akademııa talantty jastardy tartýmen qatar, ekonomıka men qoǵamnyń damýyna eleýli ıntellektýaldyq úles qosýǵa qabiletti, tájirıbeli ǵalymdardyń basyn qosatyn ǵylymı ortalyqqa aınalýy qajet. Akademııanyń negizgi mindetteriniń biri – ǵylymı zertteýlerdiń basym baǵyttaryn anyqtaý. Eldegi ǵylymdy damytýdyń basymdyqtary qalaı anyqtalatynyn jáne tehnologııalyq jaǵynan damyǵan elderdiń tájirıbesimen salystyrsaq, bizdiń elde ǵylym salasy qarjylandyrýdy bólýge kóbirek táýeldi ekenin baıqaımyz, ári onyń nátıjesi memlekettiń qajettilikterine emes, eń aldymen ǵalymdardyń múmkindikterine negizdeledi», - deıdi akademııa prezıdenti.
A. Kúrishbaev ǵylymnyń barlyq salalaryn konkýrstyq negizde qarjylandyrýdyń úsh jyldyq merzimine súıengen bir úlgidegi tásil ásirese irgeli zertteýlerdiń tıimdiliginiń tómendeýine ákep soqqanyn aıtty.
«Qazaqstan – álemdik ekonomıkanyń tutas bir bóligi. Halyq sanynyń joǵary ósý qarqynyn jáne el aldynda turǵan aýqymdy mindetterdi eskere otyryp, qazirgi qazaq ǵylymy eń aldymen pragmatıkalyq baǵytqa aınalýy tıis. Bul baǵytta Akademııa jańa ǵylymı ınnovatsııalardy ekonomıkanyń naqty sektorynda qoldanýdyń tıimdi tetikteri aıasynda usynystar engizedi. Alyp terrıtorııasy bar el úshin aımaqtyq ǵylymdy damytý óte mańyzdy. Al bul jumysty jergilikti atqarýshy organdarmen birlesip júrgizýimiz kerek», - dedi Aqylbek Kúrishbaev.