Ulttyq forma sportshylarymyzdyń kóńilinen shyqty – Dıas Ahmetshárip

<p>ASTANA. KAZINFORM &ndash; Parıj Olımpıadasynda kıetin ulttyq formasy sportshylarymyzdyń kóńilinen shyǵyp, qyzyǵýshylyqtaryn oıatqan. Bul týraly Kazinform tilshisine eksklıýzıv suhbat bergen QR Týrızm jáne sport mınıstriniń qoǵammen baılanys jáne BAQ jónindegi keńesshisi Dıas Ahmetshárip aıtyp berdi.</p>

Foto: Ádilet Birimqulov/Kazinform

- Dııas myrza, Parıj Olımpıadasynyń bastalýyna sanaýly ǵana kúnder qaldy. Bıylǵy Olımpıada oıyndaryna arnap tigilgen ulttyq forma sportshylarymyzdyń qolyna tıdi ma?

- Iá, Frantsııa astanasy Parıj qalasynda ótetin HHHІІІ jazǵy Olımpıada oıyndarynyń bastalýyna nebary eki apta ýaqyt qaldy. Biz sportshylarymyzǵa arnap arnaıy tigilgen ulttyq formalarymyzdy birtindep tarata bastadyq. Olımpıadaǵa joldama alǵan sportshylarymyzdyń basym bóligi Eýropa elderinde sońǵy oqý-javttyǵý jıyndaryn ótkizýde. Oǵan basty sebep – sportshylarymyz Parıjge jetýge óte yńǵaıly bolý úshin arnaıy oqý-jattyǵý jumystary solaı josparlanǵan.

Biz ol jaqtaǵy sportshylarymyzǵa formalaryn arnaıy jetkizip berip jatyrmyz. Al elimizde jattyǵyp jatqan sportshylarymyzǵa osydan birqansha kún buryn tarattyq.

Osydan birer kún buryn memleket basshysy Qasym-Jomart Toqaev sportshylarymzǵa Memlekettik týdy tapsyrǵanda atletterimiz sporttyq formasyn kıip bardy. Birinshi bolyp formany boksshylar, dzıýdoshylarymyz jáne jeńil atletterimiz qoldaryna alǵan bolatyn.

Sportshylarymyzdyń alǵashqy legi 20 shildede Parıjge attanady. Oǵan deıin barlyǵy kıimmen qamtamasyz etiledi. 

- Sportshylarymyz ulttyq formany qalaı qabyldady? Unatty ma?

- Árıne, birden unatty, kóńilderinen shyqty. Sebebi – forma óte sapaly materıaldan, sportshylarymyzǵa yńǵaıly etilip tigilgen. Olımpıada oıyndary tusynda Parıj qalasy óte ystyq bolýy múmkin. Sol sebepti biz kıimniń matasyna erekshe nazar aýdardyq. Ystyqta aýa ótetindeı, terlegende denege jabysyp, júrip-turǵanda tyrysyp qalmaıtyyndaı óte jeńil, denege barynsha yńǵaıly matany tańdadyq.

Dızaıynyn da osyǵan deıin tanystyrǵanda ózderińiz kórdińizder. Tigisi de óte sapaly shyqty. Sodan da bolar formany alǵan sportshylarymyz óte joǵary deńgeıde baǵalap, razylyqtaryn bildirdi.

Tipti, «myna formany kıip baryp, júldesiz kelý múmkin emes» dep aıtyp jatyr. Laıym, solaı bolǵaı, jetistigimiz kóp bolsyn dep tileı bereıik...

- Jalpy, bıylǵy Olımpıada formasy nesimen erekshelenedi?

- Biz Parıj Olımpıadasynyń formasyn tiktirý barysynda ótken jylǵy Azııa oıyndaryndaǵy olqylyqtardy eskerdik. Sol úshin arnaıy komıssııa qurdyq. Onyń quramyna burynǵy Olımpıada chempıondary, qazirgi sportshylar men bapkerler, jýrnalıster, mınıstrlik ókilderi, belgili qoǵam qaıratkerleri kirdi.

Birinshi kezeńde úmitkerlerdiń usynǵan jumysy komıssııa músheleriniń kóńilinen shyqpady. Ekinshi kezeńde 15 jumys usynylyp, sonyń ishinen eń úzdigin ashyq túrde komıssıa músheleri daýysqa salyp tańdap aldy. Nátıjesinde tańdap alynǵan eki kompanııa formanyń úsh túrin tigip berdi. Onyń ishinde sporttyq forma, jarys formasy, sondaı-aq, Olımpıada oıyndarynyń saltanatty ashylý jáne jabylý rásiminde kıetin arnaıy forma bar.

Paradtyq formanyń jeńin arnaıy qysqa qylyp tiktirdik. Sebebi, Parıjde aýa raıy óte ystyq bolatyndyqtan biz solaı sheshim qabyldadyq. Eń bastysy ulttyq formamyz sportshylarymyzǵa unady. 

- Áńgimeńizge rahmet!