Ulttyq banktiń alaıaqtyqpen kúres ortalyǵy 6 aıdaǵy nátıjesin jarııalady

<p>ASTANA. KAZINFORM &ndash; Ótken jyly Ulttyq bank alaıaqtyqpen kúres júrgizetin antıfrod-ortalyǵyn iske qosqan bolatyn. 6 aıda bul ortalyq qansha kúdikti tranzaktsııany toqtatyp, qansha qarjyny saqtap qalǵany málim boldy.</p>

Alaıaqtyq belgisi bar tranzaktsııalar týraly derek almasý ortalyǵy 2024 jylǵy 22 shildede iske qosyldy. Bul jobany quqyq qorǵaý organdary jáne qarjy naryǵyna qatysýshylar birlese júzege asyrady.

— Ortalyq iske qosylǵannan beri 12 myńnan astam alaıaqtyq anyqtaldy. Nátıjesinde jalpy somasy 967 mıllıon teńge bolatyn qarajat buǵattaldy. Onyń ishinde 760,9 mıllıon teńgeni – aqshany jibergen bank, al 206,1 mıllıon teńgeni aqshany qabyldaǵan bank buǵattady, - delingen Ulttyq bank habarlamasynda.

Antıfrod-ortalyq degenimiz – arnaıy tehnologııalyq júıe. Ol bankter, tólem uıymdary, mıkroqarjy uıymdary jáne uıaly baılanys operatorlarynyń ózara aqparat almasýyna jaǵdaı jasaıdy.

Bul júıe naqty ýaqyt rejıminde jumys isteıdi de, alaıaqtyqqa uqsaıtyn áreket nemese tólem týraly málimetti jedel bólisýge múmkindik beredi. Osylaısha, qarjy uıymdary kúmándi tranzaktsııalardy tez arada anyqtap, toqtata alady.

Sonymen qatar, Antıfrod-ortalyq qarjy uıymdary men quqyq qorǵaý organdary bergen málimetter negizinde alaıaqtyq áreketteri týraly barlyq aqparatty bir jerge jınap, biryńǵaı derekter bazasyn qurady.

Platformanyń jumysyn júrgizip, tehnologııalyq qoldaý kórsetetin uıym, ıaǵnı operatory – Ulttyq bankke qarasty «Qazaqstan Respýblıkasy Ulttyq bankiniń Ulttyq tólem korporatsııasy» AQ.

Antıfrod-ortalyqtyń málimetine súıensek, eń jıi kezdesetin alaıaqtyq túri – telefon arqyly aldaý. Ol barlyq oqıǵalardyń 25,5%-yn quraıdy.

Odan keıingi oryndarda mynalar tur: jalǵan ınvestıtsııalar – 18,89%, áleýmettik jeliler men messendjerlerdegi alaıaqtyq – 17,61%, kredıt alaıaqtyǵy – 9,57%, jalǵan onlaın dúkender men satýshylar – 7,53%, dropperler (alaıaqtyq jolmen ıemdengen aqshany sheshý úshin atyna bank kartasy ashylǵan jalǵan adamdar) – 6,87% jáne alaıaqtardyń «aına» saıttary – 5,62%.

Al qalǵan 8,36%-y – basqa alalıaqtyq túrleri.

Ulttyq bank byltyr atalǵan ortalyq jumysyn bastaǵan soń on shaqty kúnniń ishindegi nátıjesin jarııalaǵan bolatyn.