Ulttyq bank tóraǵasy Prezıdentke jyl basynan beri atqarylǵan jumystar týraly esep berdi

<p>ASTANA. KAZINFORM - Prezıdent Qasym-Jomart Toqaev Ulttyq bank tóraǵasy Tımýr Súleımenovti qabyldady, dep habarlaıdy Aqordanyń baspasóz qyzmeti.</p>

Memleket basshysyna Ulttyq banktiń byltyr jáne bıylǵy qańtar-aqpan aılarynda júrgizgen aqsha-kredıt saıasatynyń qorytyndysy týraly esep berilip, aldaǵy kezeńge arnalǵan jumys jospary tanystyryldy.

Qasym-Jomart Toqaevqa Qazaqstandaǵy jáne álemdegi ekonomıkalyq jaǵdaıdyń damý barysy, ınflıatsııanyń qarqyny men ony turaqtandyrý sharalary jóninde málimet berildi.

Atap aıtqanda, Ulttyq bank tóraǵasy jyldyq ınflıatsııanyń báseńdegenin jáne ishki ekonomıkada proınflıatsııalyq faktorlar saqtalyp otyrǵanyn jetkizdi. Sonymen qatar BJZQ aktıvteri men altyn-valıýta rezervteriniń jaı-kúıi, «Ulttyq qor – balalarǵa» baǵdarlamasynyń júzege asyrylý barysy jaıynda baıandady.

Tımýr Súleımenov Memleket basshysynyń buǵan deıin ekonomıkanyń naqty sektoryn qarjylandyrý isin keńeıtý jóninde bergen tapsyrmasynyń oryndalý barysy, sondaı-aq Ulttyq tólem júıesin damytýǵa, ashyq bankıng qaǵıdattaryn engizýge baǵyttalǵan jobalardyń iske asyrylýy týraly aıtty.

Budan bólek, Prezıdentke klıentterdiń qarajatyn alaıaqtardan qorǵaý maqsatynda antıfrod-ortalyq qurý, sondaı-aq memlekettik satyp alý jáne bıýdjet shyǵystarynyń ashyqtyǵy men tıimdiligin arttyrý úshin tsıfrlyq teńgeniń áleýetin paıdalaný jaıynda málimet berildi.

Kezdesý sońynda Qasym-Jomart Toqaev Ulttyq bank qyzmetiniń negizgi baǵyttaryna qatysty birqatar mindet júktedi.