Ulttyq Bank krıptonaryqty retteý boıynsha usynymdar ázirledi

<p>ASTANA. KAZINFORM — Qazaqstan Ulttyq Banki «Qazaqstanda tsıfrlyq aktıvterdi retteýdiń modelin qalyptastyrý úshin ártúrli elderdegi qarjy retteýshileriniń krıptoaktıvter naryǵyn retteý tásilderin taldaý» taqyrybynda <a href="https://nationalbank.kz/kz/news/issledovaniya" target="_blank" rel="noopener">zertteýdi</a> usyndy. Bul týraly banktiń resmı saıtynda habarlandy.</p>

Bul jumys halyqaralyq tájirıbe men naryqtaǵy zamanaýı úrdisterdi eskere otyryp, eldegi tsıfrlyq aktıvterdi retteýdiń tıimdi tásilderin ázirleýge baǵyttalǵan.

Zertteý aıasynda tsıfrlyq qarjy aktıvterin, krıptovalıýtalardy, steıblkoınderdi jáne tsıfrlyq aktıvterdiń basqa da túrlerin qosa alǵanda, krıptoaktıvterdiń álemdik naryǵyndaǵy qazirgi ahýalǵa taldaý júrgizildi.

Retteýdiń quqyqtyq aspektilerine jáne osy aktıvterge baılanysty táýekelderdi basqarýǵa erekshe nazar aýdaryldy. Qujatta basqa elderdiń qarjy retteýshileri qoldanatyn tásilder zerdelenip, halyqaralyq qarjy uıymdarynyń krıptoaktıvter naryǵyn retteý boıynsha usynymdary kórsetildi.

— Zertteýde Qazaqstannyń tájirıbesin taldaý qamtylyp, eldegi tsıfrlyq aktıvter naryǵynyń biregeı syn-qaterleri men erekshelikteri atap kórsetildi. Sondaı-aq, tsıfrlyq qarjy aktıvterin damytý, naqty aktıvterdi tokendeý jáne ınnovatsııalyq tehnologııalardy Qazaqstannyń tsıfrlyq ekonomıkasyna yqpaldastyrý sharalary usynyldy, — delingen taratylǵan aqparatta.

Qujatta tutynýshylardyń quqyqtaryn qorǵaýǵa jáne eldegi tsıfrlyq aktıvter ındýstrııasynyń turaqtylyǵy men ornyqty damýyn qamtamasyz ete alatyn teńgerimdi retteý júıesin qurý qajettiligine basa nazar aýdaryldy.

Eske salsaq, buǵan deıin Ulttyq bank basshysy qazaqstandyqtardy krıptovalıýtaǵa ınvestıtsııa salýǵa shaqyrǵany habarlandy.