Ulttyq bank qańtarda Ulttyq qordan $1,1 mlrd-qa deıin valıýta satýdy josparlap otyr

<p>Ulttyq bank byltyrǵy teńge dınamıkasyna baǵa berdi. Jeltoqsan aıynyń qorytyndysy boıynsha, teńge baǵamy 1 AQSh dollaryna — 454,69 teńgege deıin 0,8% nyǵaıdy. Qazaqstan qor bırjasyndaǵy saýda-sattyqtyń ortasha kúndik kólemi bir aıda 192 mln-nan 176 mln AQSh dollaryna deıin tómendedi. Saýda-sattyqtyń jalpy kólemi — 3,5 mlrd AQSh dollary, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Ulttyq qordan respýblıkalyq bıýdjetke túsetin transfertterdi qamtamasyz etý jáne «QazMunaıGaz» UK AQ aktsııalaryn satyp alý úshin jeltoqsanda 646 mln AQSh dollaryna valıýta satyldy.

«Ulttyq qordan satý úlesi jalpy saýda-sattyq kóleminiń 18%-yn jáne kúnine 34 mln AQSh dollarynan aspaıtyn mólsherdi qurady. Ulttyq bank Ulttyq qordyń qarajatymen operatsııa júrgizý kezinde naryqtyq beıtarap qaǵıdatyn saqtaıdy. Bul shetel valıýtasyn udaıy jáne birkelki satý degendi bildiredi. Bul tájirıbe Ulttyq qor operatsııalarynyń valıýta naryǵyna áserin barynsha azaıtýǵa múmkindik beredi. Ulttyq bank BJZQ zeınetaqy aktıvteriniń valıýtalyq úlesin 30% deńgeıinde ustap turý úshin jeltoqsanda bırjalyq saýda-sattyqta shetel valıýtasyn satyp alýdy jalǵastyrdy. Onyń jalpy somasy — 191 mln AQSh dollary nemese naryqtyń jalpy kóleminiń shamamen 5 paıyzy» dep habarlady búgin UB baspasóz qyzmeti.

«Qazaqstannyń depozıtterge kepildik berý qory» AQ (QDKQ) aktıvteriniń valıýtalyq úlesin ulǵaıtý aıasynda Ulttyq bank jeltoqsanda 30 mln AQSh dollary mólsherinde valıýta satyp aldy.

Ulttyq bank jeltoqsanda valıýtalyq ınterventsııa júrgizgen joq.

Úkimettiń aldyn ala boljamdy ótinimi boıynsha respýblıkalyq bıýdjetke transfert bólýge 2024 jylǵy qańtarda Ulttyq bank Ulttyq qordan 1-den 1,1 mlrd AQSh dollaryna deıingi mólsherde valıýta satpaq.

2024 jylǵy qańtarda BJZQ zeınetaqy aktıvteriniń valıýtalyq úlesin ustap turý úshin valıýta satyp alý 100 mln-nan 200 mln AQSh dollaryna deıingi mólsherde, QDKQ aktıvteriniń valıýtalyq úlesin arttyrý úshin valıýta satyp alý 30 mln AQSh dollaryna deıingi mólsherde kútilip otyr.

«Ulttyq bank ashyqtyq qaǵıdaty aıasynda valıýta naryǵynda júrgiziletin barlyq operatsııa týraly aqparatty meıilinshe tolyq ashyp kórsetýdi kózdeıdi. Qysqamerzimdi perspektıvada teńgeniń dınamıkasy naryqqa qatysýshylardyń kútýlerine, toqsandyq salyq tólemderine, álemdik naryqtardaǵy ahýalǵa jáne geosaıası jaǵdaıdyń ózgerýine baılanysty bolady. Ulttyq bank teńgerimsizdiktiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustana beredi» dep málimdedi qarjy retteýshisi.