Ulttyq bank «Báıterekke» 170 mlrd teńge zeınetaqy qarjysyn saldy

<p>ASTANA. KAZINFORM &ndash; Ulttyq bank BJZQ-dan "Báıterek" ulttyq basqarýshy holdıngi" AQ oblıgatsııalaryna 173 mıllıard teńge ınvestıtsııa saldy. Bul týraly Ulttyq banktiń baspasóz qyzmeti málimdedi.</p>

Biryńǵaı jınaqtaýshy zeınetaqy qorynyń qarajaty iri jobalardy qarjylandyrýǵa baǵyttalmaq.

Belgili bolǵandaı, oblıgatsııalardyń jyldyq kirisi 13% bolady, al aınalym merzimi – 15 jyl.
Ulttyq bankte oblıgatsııalardy satyp alý týraly sheshim ekonomıkanyń naqty sektorynyń uzaq merzimdi iri jobalaryn qarjylandyrý úshin 2024-2025 jyldar ishinde josparlanǵan BJZQ zeınetaqy aktıvterin ınvestıtsııalaý sheńberinde qabyldanǵan.

Ulttyq banktiń málimetinshe, Qazaqstan qor bırjasynda oblıgatsııalardy ornalastyrýdyń jalpy kólemi – 190 mıllıard teńge.

"Oblıgatsııalardy satyp alý salymshylardyń zeınetaqy jınaqtary boıynsha saqtaýdy qamtamasyz etý jáne naqty tabysty alý jónindegi uzaq merzimdi maqsattarǵa sáıkes keledi", - dedi Ulttyq banktiń baspasóz qyzmeti taratqan aqparatta.

Ulttyq bank "Báıterekke" salynǵan zeınetaqy qarjysy merziminen buryn qaıtarylatynyn aıtty.

"Emıtent jyl saıyn 5 jyl ótkennen keıin ustaýshylarǵa tıesili oblıgatsııalardyń bir bóligin olardyń talaby boıynsha nomınaldy quny boıynsha bastapqy ornalastyrý kóleminiń 10 paıyzyna deıingi mólsherde satyp alýǵa mindetti", - dep tolyqtyrdy vedomstvo.

"Báıterek" ulttyq basqarýshy holdıngi" AQ qarajaty kólik ınfraqurylymyn damytýǵa jumsalmaq.