Ultaralyq alaýyzdyq týdyratyn vıdeo avtory qazaq tilinde keshirim surady

QARAǴANDY. QazAqparat – Áleýmettik jelilerde qazaq ulty tarapyna balaǵat sózder aıtyp, vıdeo jazǵan ózge ult ókili ustaldy. Ol óz kinásin moıyndap, barsha qazaq jurtynan keshirim surady, dep habarlaıdy QazAqparat tilshisi.

Áleýmettik jelilerde Jezqazǵan qalasynyń túrǵyny ultaralyq alaýyzdyq týdyratyn vıdeo jazǵany týraly málimet taraǵan bolatyn. Facebook-paıdalanýshylarynyń biri atalmysh vıdeony óz paraqshasynda ornalastyrǵan. Post astyna pikir qaldyrǵandar ony jaýapkershilikke tartýdy suraǵan.

Óz kezeginde polıtsııa qyzmetkerleri derek boıynsha málimet berdi.

«26 sáýir kúni polıtsııa qyzmetkerleri áleýmettik jelilerge monıtorıng jasaý barysynda, QR Qylmystyq Kodeksiniń 174-babynda kórsetilgen «ulttyq alaýyzdyqty qozdyrý» belgileri bar belgisiz azamattyń beıneúndeýin anyqtady», - dedi Qaraǵandy oblysy Polıtsııa departamentiniń baspasóz qyzmetinen.

Polıtsııa qyzmetkerleri beınejazbanyń avtory Jezqazǵan qalasynyń 27 jastaǵy turǵynyn anyqtap, ustaǵanyn habarlady. Ol barsha qazaq jurtynan jasaǵan áreketi úshin keshirim surap, vıdeo jazdy.

«Salamatsyzdar ma!» dep qazaq tilinde amandasqan turǵyn, bul áreketke oılanbastan barǵanyn aıtyp, shyn júrekten keshirim suraıtynyn jetkizdi. «Meniń qazaq dostarym bar, biz bir-birimizdi qurmetteımiz, aramyzda túsinispeýshilik joq», - degen ol, «Keshirim suraımyn!», - dep sózin taǵy da qazaq tilinde aıaqtady.

Aıta keteıik, qazirgi tańda atalǵan fakti boıynsha sotka deıingi tergeý júrgizilip, tıisti saraptamalar taǵaıyndaldy.