Ult saýlyǵy birinshi orynda bolýy kerek - Súndet Baıǵojın

QOSTANAI. QazAqparat - Qazaqstannyń eńbek sińirgen qaıratkeri, E. Ómirzaqov atyndaǵy Qostanaı oblystyq fılarmonııasynyń basshysy Súndet Baıǵojın Qazaqstan halqyn karantın talaptaryn qatań saqtaýǵa shaqyrdy, dep habarlaıdy QazAqparat tilshisi.

«Qurmetti otandastar! Barshańyzǵa málim, elimiz qazir kúrdeli ahýaldy bastan ótkerýde. Ózim karantın belgilengen kúnnen bastap sanıtarlyq talaptardy turaqty túrde saqtap kelemin. Ult saýlyǵy birinshi orynda bolýy kerek. Árqaısymyz ózimizdiń, jaqyndarymyzdyń densaýlyǵy men ómirine janashyrlyq tanytqanymyz abzal. Alaıda, aramyzda indettiń bar ekenine senbeıtin adamdar joq emes. Qanshama dos-jarandarymyz, týys-týǵandarymyz, dańqty tulǵalarymyz indettiń ilmegine ilinip, ómirden ótti. Sondyqtan árqaısymyz áleýmettik jaýapkershilikti sezingenimiz jón», - deıdi «Qurmet» ordeniniń ıegeri.

Osy oraıda Súndet Baıǵojın daǵdarysty abyroımen eńserý úshin qaýipsizdik erejelerin qatań saqtap, engizilgen shekteýlerge asa joǵary jaýapkershilikpen qaraýǵa shaqyrdy.

«Qıyn kezeńnen aman-esen shyǵyp, qazaq óneriniń qara shańyraqtary esikterin aıqara ashyp, qalypty ómirge qaıta oralatyn kúnge jeteıik», - deıdi ol.

Sondaı-aq, Súndet Baıǵojın álemdi alańdatqan indetke tosqaýyl bolyp, azamattarymyzdyń ómirine arasha túsip júrgen dárigerlerge alǵysyn jetkizdi.