Ult Kóshbasshysy indetti jeńetindigine senemiz -Qyzylorda oblystyq ózbek etnomádenı birlestiginiń jetekshisi

NUR-SULTAN. QazAqparat - Elbasy Nursultan Nazarbaevtyń koronavırýs indetin juqtyrǵanyn estidim. Ult Kóshbasshysy indetti jeńedi dep senemiz. Sebebi ol kisiniń rýhy myqty, qaıta qaıtpas qaısarlyǵy bıik,- degen pikir bildirdi Qyzylorda oblystyq ózbek etnomádenı birlestiginiń jetekshisi Qahar Dadashev QHA resmı saıtynda.

Qahar Dadashevtiń paıymdaýynsha, koronavırýs epıdemııasy bastalǵaly beri álemde túrli qaýesetter kóbeıip ketken. Biri indet bar dese, biri senbestik bildirýde. Degenmen, «saqtansań saqtaımyn» degendeı, birqatar óńirlerde indet juqtyrǵandar qatary erejelerdi elemeý saldarynan artýda. Sondyqtan karantınge qatysty el basshylyǵy engizgen sharalardy qatań ustanǵan abzal.

«Árıne, ár is ýaqyt pen sabyrlyqty qajet etedi. Osy oraıda árbir qazaqstandyq azamatqa aýrýdyń aldyn alý sharalaryna muqııat mán berse eken deımin. Sonda ǵana biz aýrýdyń údeı túsýine jol bermeı, birlesip, barlyǵyn jeńemiz»,- deıdi ózbek etnomádenı birlestiginiń jetekshisi.