Úlken qalalarda mektep psıhologtarynyń shtaty kóbeıedi - mınıstr
Bul týraly QR Bilim jáne ǵylym mınıstri Erlan Saǵadıev Úkimet otyrysynda málimdedi.
Mınıstrdiń aıtýynsha, sońǵy kezderi balalarǵa psıhologııalyq kómek kórsetý máseleleri jıi kóteriledi.
«Qazirgi ýaqytta 7 myńnan astam psıholog-pedagogymyz bar. Respýblıka boıynsha bir psıhologqa 300 baladan keledi. Kórsetkish jaman emes. Biraq, Astana, Almaty, Shymkent syndy úlken qalalarda bir psıholog myńnan astam balamen jumys isteıdi. Sebebi, bizdiń ereje boıynsha qazir bir psıholog balalardyń sanyna emes, synypqa beriledi. Árıne, synypta ortasha 10-15 bala bolsa, psıhologtar jeter edi. Qaladaǵy synyptarda 35-45 bala bar jáne psıholog myńnan astam balamen jumys isteýge májbúr. Qazir tıisti ózgerister engizip jatyrmyz. Úlken qalalarda jańa psıhologtardy jumysqa alý qajet bolady, ákimderge osy máselege nazar aýdarýdy suraımyz», - dep atap ótti mınıstr Saǵadıev.
Sonymen birge, mınıstr jalpy bilim berý uıymdaryndaǵy psıhologtardyń kásibı deńgeıi kóńil kónshitpeıtinin jetkizdi.
«Osy máseleni sheshý úshin «Baqytty otbasy» jáne Qyzylorda oblysynda ıÝNISEF baǵdarlamasy syndy birneshe jobalar pılottyq rejimde júrgizildi. Endi mınıstrlik júıeli túrde osy pılottardy biriktirip, sheteldik mamandardy tarta otyryp, biryńǵaı memlekettik baǵdarlama jasaıdy. Ulttyq testileý engizip, psıholog-kadrlardyń biliktiligin arttyrý kýrstaryn ótkizedi. Jańa testileý júıesi arqyly pedagog-psıhologtardyń sanattaryn ózgertip, aılyqtaryn kóterý máseleleri sheshiletin qujattar ázirlenip jatyr», - dedi Erlan Saǵadıev.
Jańa júıe jyl sońyna deıin tolyq ázirlenip, psıhologtardyń talqysynan ótip, Úkimettiń qaraýyna engiziledi.