Úlken Almaty kanaly arqyly Seıfýllın kóshesimen ótetin kópir qalaı jóndelip jatyr
Buǵan deıin jelide Seıfýllın kóshesindegi kópirdiń bútin granıt tastaryn buzyp jatyr delingen aqparat taraǵan bolatyn. Degenmen, qalalyq Mobıldilik basqarmasy ol aqparatty teriske shyǵaryp, granıt tastar tazalaý úshin alynǵanyn, al bútinderi qaıta ornyna qoıylatynyn málimdegen edi.
Qalalyq Mobıldilik basqarmasynyń basshysy Saǵyndyq Telibaevtyń aıtýynsha, atalǵan kópir ótken ǵasyrdyń 80-jyldarynda salynǵan. Sol ýaqyttan beri kópirge jóndeý júrgizilmegen. Ár jyldary aǵymdyq jóndeý aıasynda birli-jarym synǵan, tozǵan plıtalar aýystyrylyp turǵan.
«Kópirde qaptamalardyń apatty jaǵdaıdaǵy bólshekteri ǵana aýystyrylady. Al 1980 jyldan beri saqtalǵan sapaly granıt jabyndylar ornynda qalady. Kópir qaptamasyna materıaldyń eki túri qoldanylǵanyn atap ótkim keledi. Oń jaǵynda – tutas granıt tastar, sol jaǵynda – Seıfýllın dańǵylymen júrginshilerge arnalǵan tusynda – qalyńdyǵy 20 mm-lik kesilgen granıt plıtalar», - dedi ol.
Betki jaǵy búlingenimen jaqsy jaǵdaıdaǵy bútin aýyr granıt tastar aýystyrylmaıdy. Olar tek tazartý jáne óńdeý úshin ǵana alynady. Sodan keıin sol jerge qaıta ornatylady. Buǵan qosa, ýchaskeni tekserip qaraý barysynda baspaldaqtaǵy granıt plıtalardyń qozǵalyp ketkeni, qabyrǵaǵa japsyrylǵan granıt plıtalardyń qabattasyp qalǵany da anyqtalǵan. Munyń bári jaıaý júrshinshilerge qaýip tóndiredi. Jóndeý jumystary barysynda atalǵan plıtalar da tazartylyp, burynǵy oryndaryna qoıylady.
Seıfýllın dańǵylynyń júrginshiler jaǵyn qaptaý úshin qoldanylatyn qalyńdyǵy 20 mm-lik kesilgen jalpaq granıt plıtalarǵa keletin bolsaq, búginde olardyń aqaýlary jáne synǵandary bar. Bul plıtalar uqsas plıtalarǵa aýystyrylady. Bólshektelgen jáne aýystyrylǵan plıtalardyń jalpy sany 25 paıyzdan aspaıdy.
Qalalyq Mobıldilik basqarmasy ornatylatyn granıt plıtalardyń memlekettik tehnıkalyq retteý júıesiniń derekter tiziliminde tirkelgen sáıkestik sertıfıkaty bar ekendigin atap ótedi. Atalǵan sertıfıkat qaptama plıtalar tabıǵı tastan – granıtten jasalǵanyn kýálandyrady.
«Eger biz bul kópirdi osy kúıinde qaldyratyn bolsaq, onda ol jaıaý júrginshilerge úlken qaýip tóndirer edi. Munda tipti granıt baspaldaqtar jyljyp ketken. Keıbir jerlerde olar múldem joq. Al keıbir jerlerde 10-15 sm-ge deıin jaryqtar paıda bolǵan», - dedi ol.
Saǵyndyq Telibaev kópirdi jóndeý Túrksib aýdany turǵyndarynyń ótinishimen jaıaý júrginshilerdiń qaýipsizdigin qamtamasyz etý maqsatynda júrgizilip jatqanyn aıtty. Bul jumystar aǵymdaǵy jóndeý aıasynda oryndalyp, bıýdjetten shamamen 50 mln teńge jumsalady. Jóndeý shilde aıynyń sońyna deıin aıaqtaý josparlanǵan.
Eske salaıyq, Almaty ákimdigi Ofıtserler úıi ǵımaratynyń aldyndaǵy plıtalardy kim jáne ne úshin alyp jatqanyn túsindirgen bolatyn.