Ulytaýda sý tasqyny qaýpi seıildi

<p>ASTANA. KAZINFORM &ndash; Ulytaý oblysynda sý tasqyny kezeńi turaqtaldy. Bul týraly oblys ákiminiń orynbasary Ulantaı Úsenov baıandady.</p>

Onyń aıtýynsha, negizgi Keńgir, Sarysý, Jezdi ózenderindegi 25 gıdrotehnıkalyq qurylǵy baqylaýda tur.

«Oblystyń eki aýdanynda 22 úıdi sý basý saldarynan jergilikti aýqymdaǵy TJ jarııalandy. Búgingi tańda turǵyndardyń shyǵyny boıynsha smetalar daıyndalyp, qalpyna keltirý kesteleri jasalyp jatyr. Úılerge tolyq saraptama júrgizildi. Tórt azamat otbasymen birge aýdandaǵy basqa úılerge kóshirildi», - dedi spıker Respýblıkalyq aqparattyq shtabta ótken brıfıngte.

Sonymen birge, sý astynda qalǵan aımaqtardaǵy azamattarǵa materıaldyq kómek kórsetildi.

«29 otbasyna 100 AEK mólsherinde áleýmettik kómek berildi. Sondaı-aq, Qostanaı oblysyna gýmanıtarlyq kómek jóneltiledi. Aldaǵy ýaqytta qosymsha kerek-jaraqtar jiberiledi. Oblys boıynsha buzylǵan 12 joldy qalpyna keltirý jumystary qolǵa alyndy», - dedi spıker.

Mal shyǵynyn esepteý boıynsha da jumystar júrgizilýde. Óńirdegi 19 mal qorymyn sý basý qaýpi joq.

«SES mamandary sýdyń sapasyn tekserip jatyr. Sýdyń zııany týraly eshqandaı aqparat joq. Sondyqtan oblys kóleminde jaǵdaı birqalypty», - dedi U.Úsenov.