Ulytaýda múmkindigi shekteýli adamdar úshin 81 nysan qaıta beıimdeldi

<p>ASTANA. KAZINFORM - Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Ulytaý oblysynda áleýmettik ınfraqurylymnyń 81 obektisi tolyq beıimdeldi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.&nbsp;</p>

Qazirgi ýaqytta elimizde Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıingi ulttyq jospar, «Amanat» partııasynyń 2023 – 2027 jyldardaǵy jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylýda.

«Amanat» partııasynyń jol kartasynda 2023 – 2027 jyldar aralyǵynda Interaktıvti qoljetimdilik kartasyna (budan ári – Karta) engizilgen 35 myńnan astam nysandy beıimdeý boıynsha jumys kózdelgen. Jyl saıyn obektilerdiń 20 %-y beıimdelýge jatady.

Osylaısha, 2023 jyly – Kartadaǵy obektilerdiń 20%, 2024 jyly – 40%, 2025 jyly – 60%, 2026 jyly – 80%, 2027 jyly – 100%. Qazirgi ýaqytta el boıynsha 16 175 obekt tolyǵymen beıimdelgen.

Osy jyldyń sońyna deıin Ulytaý oblysy boıynsha 148 obektini beıimdeý josparlanǵan, onyń ishinde qazirgi ýaqytta 81 obekt beıimdelgen.

Máselen, óńirdegi 81 obektiniń ishinen tómendegi obektiler múgedektigi bar adamdardyń barlyq sanattary úshin qol jetimdi:

- memlekettik uıymdar – 27;

- bilim berý obektileri – 23;

- mádenıet nysandary – 16;

- saýda jáne qyzmet kórsetý obektileri – 7;

- densaýlyq saqtaý obektileri – 5;

- sport nysandary – 2;

- kólik ınfraqurylymynyń obektileri – 1.

«Qala boıynsha múgedektigi bar adamdar úshin jaıly orta qalyptasyp keledi. Jaqynda S. Qojamqulov atyndaǵy Jezqazǵan qazaq mýzykalyq-drama teatrynda múgedektigi bar adamdar úshin qajetti jaǵdaılar jasalyndy. Sondaı-aq, oblys boıynsha áleýmettik ınfraqurylymdy talaptarǵa sáıkes beıimdeý boıynsha qajetti jumystar júrgizilýde. Bul bizdi erekshe qýantady», – dedi Jezqazǵan qalasynyń turǵyny Murat Aldajarov.

Budan basqa, memlekettik baqylaý sheńberinde Eńbek jáne áleýmettik qorǵaý komıtetiniń Ulytaý oblysy boıynsha departamenti 2024 jyldyń birinshi jartyjyldyǵynyń qorytyndysy boıynsha memlekettik basqarý, densaýlyq saqtaý, áleýmettik qorǵaý, mádenıet, jeke kásipkerlik jáne t. b. salalardaǵy áleýmettik ınfraqurylym obektilerine 72 tekserý júrgizdi, onyń ishinde: 19-y jospardan tys tekserýler, 21-y profılaktıkalyq baqylaý sheńberinde jáne prokýratýranyń talaby boıynsha 32 tekserý boldy.

Tekserý qorytyndysy boıynsha anyqtalǵan buzýshylyqtardy joıý týraly 21 uıǵarym berildi, 3,36 mln teńgeden astam somaǵa 17 ákimshilik aıyppul salyndy.

Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.