Ulytaýda Memlekettik rámizder alańy ashylady
2022 jyly maýsymda Prezıdent Qasym-Jomart Toqaev Ulttyq quryltaıdyń birinshi otyrysynda qazaq halqynyń birligin áıgileıtin sáýletti nysan – Memlekettik rámizder alańyn ashýdy tapsyrdy. Búginde nysan qurylysynyń 85%-ǵa jýyǵy aıaqtalǵan. Alańda Qazaqstan tarıhynyń ártúrli kezeńin beıneleıtin barelefter, jaıaý júrginshi joldary salynady. Nysannyń jalpy aýmaǵy 3 gektardy quraıdy. Qazirde kógaldandyrý jáne jaryqtandyrý jumysy júrgizilip jatyr.
– Ulytaý topyraǵy – Uly dala tarıhynyń kýágeri, ultymyzdyń rýhanı astanasy. Dál osy jerde 1730 jyly jońǵarlarǵa qarsy úsh júzdiń jasaǵy jınaldy. Jyl saıyn mundaǵy kıeli oryndarǵa 40 myńǵa jýyq meıman keledi. Ulytaý aýdanynda 600-den astam eskertkish bar. Sondyqtan týrızmdi damytý – «AMANAT» partııasy Ulytaý oblystyq saılaýaldy baǵdarlamasyndaǵy negizgi basymdyqtardyń biri. Qonaq úı, sanatorıı salý, joldardy jańǵyrtý jónindegi keshendi is-sharalar 2028 jylǵa qaraı jyl saıynǵy týrıster sanyn 30%-ǵa arttyrýǵa múmkindik beredi, – dedi Erbolat Satybaldın.
Máselen, 2027 jylǵa qaraı Áýlıetaý shyńyna aparatyn jol salynady, Ulytaý aýdanynyń Kúmisbulaq jáne Tasbulaq bulaqtarynyń aýmaǵy abattandyrylady, «Sátbaev-Malshybaı» avtomobıl joly, «Joshy han» kesenesi, Dombaýyl qorymy qaıta jańartylady.
Osy kúni Erbolat Satybaldın azamattardy qabyldady. Ulytaýlyqtar depýtatqa: ınfraqurylymnyń jaı-kúıi, áleýmettik tólemder mólsherin arttyrý, sondaı-aq densaýlyq saqtaý jáne bilim berý máseleleri boıynsha júgindi. Atap aıtqanda, Ulytaý aýylynyń birneshe turǵyny isin jańadan bastaǵan sharýalarǵa memleket tarapynan usynylatyn jeńildetilgen nesıeni qalaı alýǵa bolatynyn surady. Májilismen jaýap retinde «AMANAT» partııasynyń «Aýyl amanaty» jobasy týraly aqparatpen bólisti.
– Aýyl turǵyndaryna 5-7 jyl merzimge jyldyq mólsherlemesi 2,5 paıyzdy quraıtyn shaǵyn nesıe beriledi. Azamattar 8,6 mln teńge deıin nesıe ala alady. Osylaısha, sharýa jeke kásibin asha otyryp, qaryzdan qutylyp qana qoımaı, ál-aýqatyn da edáýir jaqsarta alady. Prezıdent byltyr Qazaqstan halqyna Joldaýynda «Aýyl amanaty» jobasynyń mańyzyn atap ótip, jeke qosalqy sharýashylyqtar kooperatsııasyn yntalandyrýdy tapsyrdy. Jobany júzege asyrý jumysy bastalǵannan beri Ulytaý oblysynda jalpy somasy 3 mlrd teńgeni quraıtyn 380-nen astam joba maquldandy. Qarajattyń basym bóligi mal sharýashylyǵyn damytýǵa baǵyttaldy. Ulytaý aýylynyń kóp turǵyny jeńildetilgen nesıe aldy. Azamattardy jobaǵa belsendi qatysýǵa shaqyramyn, – dedi Erbolat Satybaldın.