Ulytaýlyq súıgen qyzynyń jalańash sýretin jelige jarııalaǵany úshin jazaǵa tartyldy

<p>ASTANA. KAZINFORM — Sátbaev qalalyq soty jábirlenýshiniń kelisiminsiz ınternet arqyly jeke aqparat taratyp, onyń quqyqtary men zańdy múddelerine eleýli zııan keltirgen sottalýshy «S»-ǵa qatysty úkim shyǵardy.</p>

Sot materıaldaryna sáıkes, sottalýshy «S» 2024 jyldyń 21 tamyzynda saǵat 00:32 shamasynda óziniń burynǵy qyzy, 2002 jyly týǵan «T»-ny masqaralaý maqsatynda Telegram arnasynda «V» atty top ashqan. Topqa jábirlenýshiniń 12 tanysyn, týystaryn jáne dostaryn qosyp, óz uıaly telefonynda saqtalǵan, jábirlenýshiniń kindikten joǵary jalańash túsken eki sýretin, hat almasýlaryn jáne jeke qupııa bolyp sanalatyn aqparattaryn jarııalaǵan.

Sonymen qatar, sottalýshy «S» TIK-TOK áleýmettik jelisinde @g paraqshasyn ashyp, jalpy qoljetimdi ekenin bile tura, jábirlenýshini masqaralaý maqsatynda onyń dıktofon jazbasyn beınejazba retinde jarııalaǵan. Osylaısha, sottalýshy QR Qylmystyq kodeksiniń 147-babynyń 5-bóliginde kózdelgen jeke ómirge qolsuǵylmaýshylyqty, sondaı-aq derbes derekter jáne olardy qorǵaý týraly zańnamany buzǵan.

Sot otyrysynda sottalýshy kinásin tolyq moıyndap, jasaǵan isine ókinetinin bildirdi. Onyń kinási sotqa usynylǵan jáne sotta zerttelgen dálelder jıyntyǵymen rastaldy. Sot jaza taǵaıyndaý kezinde sottalýshynyń kinásin moıyndaǵanyn jáne jeńildetetin, sondaı-aq aýyrlatatyn mán-jaılardy eskerdi.

— Sot úkimimen «S» Qylmystyq kodekstiń 147-babynyń 5-bóligi boıynsha kináli dep tanylyp, 3 jylǵa bas bostandyǵynan aıyrý jazasyna kesildi. Jazasyn qylmystyq-atqarý júıesiniń ortasha qaýipsiz mekemelerinde óteıtin bolady. Sottalýshy sot zalynan qamaqqa alyndy. Úkim zańdy kúshine engen joq, — delingen sot taratqan habarlamada.

Buǵan deıin Memlekettik kirister departamentiniń burynǵy qyzmetkeri 75 mln teńge para alǵany úshin 10 jylǵa sottalǵany anyqtaldy.