Ulytaý oblysynyń soltústiginde 1-6 gradýs úsik júredi - Qazgıdromet

<p>ASTANA. KAZINFORM &ndash; Elimizdiń basym bóliginde aýa raıyna atmosferalyq frontaldy bólikter áser etip, ońtústikte, ońtústik-shyǵysta qatty jańbyr jaýady.</p>

Al, soltústikte, shyǵysta, ortalyqta qatty jańbyr, qar jaýady. Respýblıka boıynsha jel kúsheıedi. Ońtústikte, ońtústik-shyǵysta, ortalyqta burshaq jaýsa, ońtústikte, ońtústik-shyǵysta daýyl tirkelýi múmkin.

«Ońtústik-batysta, ońtústikte, batysta shańdy daýyl, soltústikte tuman bolady. Aldaǵy túnderi Soltústik Qazaqstan oblysynda, Aqmola, Qostanaı oblystarynyń batysynda, soltústiginde, Aqtóbe oblysynyń soltústik-batysynda, Pavlodar oblysynyń shyǵysynda, ońtústiginde, Ulytaý oblysynyń soltústiginde 1-6 gradýs úsik kútiledi», - dedi «Qazgıdromet» RMK baspasóz hatshysy Alına Ismagýlova Ortalyq kommýnıkatsııalar alańynda ótken brıfıngte.

Sonymen qatar keıbir óńirlerde aýa raıyna baılanysty eskertý jarııalandy. 1-2 mamyrda Jetisý, Jambyl oblystarynda, 1-3 mamyrda Almaty oblysynda qatty jaýyn-shashyn jaýady degen yqtımaldyq bolǵandyqtan taý jáne taý etegindegi aımaqtarda betkeılik aǵyndynyń qalyptasýy jáne ózenderde sý deńgeıleriniń kóterilýi kútiledi. Sonymen qatar sý jaıylýy múmkin.