Ulytaý oblysynyń ákimi: Turǵyndardyń bári resmı din jolynda deýge bolady

<p>Ulytaý oblysynyń ákimi Berik Ábdiǵalıuly Ortalyq kommýnıkatsııalar qyzmetinde ótken brıfıngide óńirdiń dinı ahýalyn turaqty dep baǵalaıtynyn aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Statıstıkaǵa kelsek, bizde aqparat bar. Qazir negizinen aǵartý jumystaryn júrgizemiz. Teologtar, Din basqarmasy tarpynan aǵartý jumystaryn júrgizý sharalary bar. Bireýlerdiń yqpalyna túsip qalǵan otbasylar bar, kelip jatqan áıelderi, balalary bar. Kóptegen is-shara ótkizilip jatyr. Ótkende Eldos Jumadildá degen ustaz keldi. Sol sekildi myqty ustazdar kelip, aǵartý jumystaryn júrgizip jatyr. Ahýal turaqty dep aıtýǵa bolady», – dedi aımaq basshysy.

Ákim óńirdegi dinı ahýaldyń neden shaıqalýyn boljaý qıyn ekenin aıtady.

«Kezinde nege bastalyp ketkenin aıta almaımyn. Degenmen, qazir burynǵydaı emes. Arnaıy organdardyń tergeý, baqylaý jumystary júrgizilip jatyr. Bizge bergen aqparat boıynsha, ahýal – turaqty. Turǵyndarymyzdyń bári de qazir resmı din jolynda deýge bolady. Óz ustanymynda júrse de, qoǵamnyń tártibin qabyldap, eshqandaı zańbuzýshylyq jasap jatqan joq», – dedi Berik Ábdiǵalı.