Ulytaý oblysynda sý tasqyny kezeńi shtattyq rejımde ótip jatyr
Oblysta kún raıynyń kúrt jylynýy, qardyń jyldam erýi saldarynan gıdrologııalyq ahýal 25 naýryzdan kúrdelene bastaǵan. Qazirgi tańda jaǵdaı tolyq baqylaýda. Jergilikti atqarýshy organdar men tótenshe jaǵdaılar departamenti, polıtsııa qyzmetkerleri táýlik boıy kezekshilik atqaryp, qaýiptiń aldyn alyp jatyr.
Der kezinde qolǵa alynǵan aldyn alý sharalarynyń arqasynda oblystyń Jańaarqa, Ulytaý aýdandaryndaǵy 66 turǵyn úı men 9 qystaqty sý basý qaýpi seıildi. Qutqarý, aldyn alý sharalary barysynda barlyǵy 108 adam, onyń ishinde 56 bala evakýatsııalandy. Qaýipsiz orynǵa 349 bas iri qara, 858 bas usaq mal jáne 17 bas jylqy maly aıdaldy.
«Oblys aýmaǵynda qutqarý jumystaryn úılestirý úshin jedel shtab jumys istep tur. Osy ýaqyt ishinde oblystyq, aýdandyq mańyzy bar 3 avtokólik jolynyń keıbir ýchaskelerin sý shaıý oqıǵasy tirkeldi. Qazir atalǵan jol ýchaskeleri qalpyna keltirilip jatyr. Jalpy, óńirde respýblıkalyq, oblystyq mańyzy bar negizgi joldarda qatynas úzilgen joq, elektr, jylý jelileri, basqa da tirshilik qamtamasyz etý nysandary shtattyq rejımde jumys istep tur», - deıdi oblys ákiminiń orynbasary Ulantaı Úsenov.
Ákimdikter men tótenshe jaǵdaılar qyzmetiniń sý bógeý jumystaryna óńirdegi kásiporyndar men bıznes nysandary, eriktiler de qol ushyn sozyp jatyr. Oblys ortalyǵyndaǵy Keńgir sý qoımasy 29 naýryzda qar sýynyń esebinen jobalyq qýatyna toldy. Artyq sý arnaıy shlıýz (shandor) arqyly Keńgir ózenine aǵyzylýda.