Ulytaý oblysynda Naýryz merekesine oraı qandaı is-shara ótedi

<p>JEZQAZǴAN. KAZINFORM &ndash; Ulytaý oblysynda Naýryz merekesi jańa formatta atap ótilmek. Bul týraly Ulytaý oblysy óńirlik kommýnıkatsııalar qyzmetinde ótken brıfıngide aıtyldy.</p>

Oblysta 14-23 naýryz aralyǵynda «Naýryznama» onkúndigi jarııalanyp, oblys, aýdan, qala deńgeıinde birqatar mádenı-tanymdyq, sporttyq-kópshilik jáne qaıyrymdylyq is-sharalary ótedi.

Óńirlik kommýnıkatsııalar qyzmetinde uıymdastyrylǵan brıfıngide Ulytaý oblysy Qoǵamdyq damý basqarmasynyń basshysy Darhan Muhan men Mádenıet, tilderdi damytý jáne arhıv isi basqarmasy basshysynyń mindetin atqarýshy Ǵalııa Túgelbaeva onkúndiktiń josparyn tanystyrdy.

«Naýryz merekesin atap ótý jónindegi jańa tujyrymdamaǵa sáıkes oblystyq deńgeıdegi is-sharalar jospary ázirlendi. Oǵan 80-ge jýyq is-shara enip otyr. Olardyń arasynda salt-dástúr men ulttyq ǵuryptarymyzdy nasıhattaýǵa baǵyttalǵan rýhanı keshter, ıntellektýaldy saıystar, ulttyq sport túrlerinen jarystar, az qamtylǵan, kópbalaly otbasylarǵa arnalǵan qaıyrymdylyq sharalary endi», - dedi qoǵamdyq damý basqarmasynyń basshysy D.Muhan.

Spıkerdiń aıtýynsha, onkúndik aıasynda oblysta jańa bıznes nysandarynyń ashylýy, kezekte turǵan azamattarǵa páterler tabystaý, metsenattarǵa qurmet kórsetý, sulýlyq baıqaýlary josparlanyp otyr.

21-22 naýryzda merekeniń negizgi is-sharalary ótedi.

«Oblys ortalyǵyndaǵy Alash alańynda kósh kerýenimen bastalatyn Naýryz saltanaty estrada juldyzdarynyń qatysýymen ótetin kontsertke ulasady. Merekelik baǵdarlama aıasynda «Qazaǵymnyń kıiz úıi», «Qazaǵymnyń dástúrleri-aı» konkýrstary, ulttyq sport túrlerinen saıystar ótedi», - dedi mádenıet, tilderdi damytý jáne arhıv isi basqarmasy basshysynyń mindetin atqarýshy Ǵ.Túgelbaeva.

Merekelik is-sharalar oblys aýdandarynyń shalǵaı aýyldarynda da uıymdastyrylyp, meıram tek mádenı-kópshilik qana emes qaıyrymdylyq sıpat alady. Al 23 naýryzda jalpy oblys aýmaǵynda «Tazalyq estafetasy» ekologııalyq aktsııasy ótedi.