Ulytaý oblysynda 3,7 mlrd teńgeni quraıtyn zańsyz memlekettik satyp alýlar anyqtaldy

<p>JEZQAZǴAN. KAZINFORM &ndash; Ulytaý oblysynyń prokýratýrasy aǵymdaǵy jyldyń basynan jalpy somasy 3,7 mlrd teńgeni quraıtyn 12 memlekettik satyp alýdyń kúshin joıdy.</p>

Taldaý nátıjeleri kórsetkendeı, jergilikti atqarýshy organdar konkýrstardy jarııalaý kezinde tıisti saraptamalar júrgizbegen, jobalyq-smetalyq qujattamalar bolmaǵan jáne áleýetti jetkizýshilerdiń jaǵdaıyn nasharlatatyn talaptar kózdegen.

«Mysaly, Jezqazǵan qalasynyń ekonomıka jáne qarjy bólimi 1,9 mlrd teńgege avtomobıl joldaryn kútip ustaýǵa memlekettik satyp alý jarııalaǵan.

Bul rette tapsyrys berýshi konkýrstyq qujattamada zańda kózdelmegen biliktilik talaptaryn negizsiz qoıǵan (memlekettik satyp alý nysanasyna jatpaıtyn zańnamany saqtaý bóliginde).

Sonymen qatar tapsyrys berýshi bıýdjet zańnamasynyń talaptaryn buza otyryp, 3 jyl merzimge qala joldaryn kútip ustaý týraly kelisim-shart jasasýdy josparlaǵan», — dep jazdy vedomstvodan.

Alaıda, mundaı jumystar merzimi aǵymdaǵy qarjy jylynan asatyn sharttar tizimine kirmeıdi.

Basqa jaǵdaıda, Ulytaý oblysy Densaýlyq saqtaý basqarmasynyń psıhıkalyq densaýlyq ortalyǵy naýqastardy tamaqtandyrý qyzmetin satyp alý kezinde qarjyny 17,2 mln teńgege negizsiz joǵarylatqan.

Prokýrorlardyń narazylyǵymen zańsyz memlekettik satyp alýlar joıylyp, 9 laýazymdy tulǵa tártiptik, 17-si ákimshilik jaýapkershilikke tartyldy.

Qadaǵalaý qyzmetiniń bul baǵyty Ulytaý oblysy prokýratýrasynyń erekshe baqylaýynda.