Ulymdy ańdyp júrgender bar sııaqty: Dáýlet Turlyhanov balasy tap bolǵan daýly oqıǵa týraly

<p>ASTANA. KAZINFORM &ndash; Májilis depýtaty Dáýlet Turlyhanov ulynyń basyndaǵy daýǵa baılanysty pikir bildirdi.</p>

Májilis otyrysynyń aldynda jýrnalıster depýtattan ulynyń nege daýly oqıǵa tap bola beretinin surady.

«Jas bala týǵan kúnge barǵan. Únemi onymen áńgimelesip turamyn. Zań buzýǵa bolmaıtynyn aıtam», - dedi D.Turlyhanov.

«ıAǵnı, ulyńyz tyńdamaı júr me?», - dep surady jýrnalıst.

Depýtat ulyn tárbıeli bala dep esepteıtinin aıtady.

«Solaı shyǵar... Aıtaıyn degenim, qaı áke balasyn jaman bolsyn dep tárbıeleıdi?.. Qoldan kelgenshe tárbıe berdik, aqylymdy aıtyp júrdim. Bala biraq jaqsy, jaqsy bala. Biraq men úshin be, bilmeımin, balanyń artynan ańdý bar. Áıtpese 21-degi bala. Erteń ol bala júıkesi tozyp, aýrý bolyp ketýi múmkin. Oǵan kim jaýapty? Aıtaıyn degenim, balam óte jaqsy bala, tárbıeli. Búgingi kúni onyń artynan ańdyp endi... Týǵan kúnge barýǵa bolmaı ma? Óziniń jasyndaǵy dostarymen aralasýǵa bolmaı ma? Sol jaǵy da men qatty oılandyrady», - dedi ol.

Depýtat ulynyń basyndaǵy daý onyń depýtattyq mandatyna áser etpeýi kerek dep esepteıtinin jetkizdi.

«Men birmandattyq okrýgten saılandym. Mandatymdy tapsyram ba, joq pa, ony saılaýshylarym ǵana sheshe alady. Búginde men el azamaty retinde elimizdiń bolashaǵy úshin óte abyroımen jumys istep jatyrmyn. Meniń jumysyma áriptesterimnen eshqandaı suraq joq», - dedi Dáýlet Turlyhanov.

Depýtat balasynyń áreketteri bas bostandyǵynan aıyrý jazasyn taǵaıyndaýǵa negiz bola almaıdy dep esepteıtinin de aıtty.

«21-degi bala áli. Endi qalaı aıtýǵa bolady? Ómirdi áli kórmegen bala. Ony bas bostandyǵynan ne úshin aıyrý kerek ? Saǵat keshki 20.30-da áriptesterimen otyrǵan ǵoı. Іship otyrǵan joq ol jerde. Ol bala ishpeıdi. Óıtip birden túrmege qamaıtyn bolsaq, onda ol durys bolmaıdy. Ol tárbıe emes», - dedi depýtat.

Sondaı-aq, ol jýrnalıstiń «Densaýlyǵyna alańdaımyn dep otyrsyz. Sonda ol óz-ózine qol jumsaýy múmkin be?», - degen suraǵyna «Bári bolýy múmkin», - dep jaýap berdi.

«Shyn aıtaıyn. Kún saıyn jazady. Telefonda bári jazyp jatyr. Bireý jaqsy aıtsa, bireý jaman aıtyp jatyr. Ol bala da oılanady. Ol balaǵa janym ashyp júr. Uıqysy joq», - deıdi Májilis depýtaty.

Eske salsaq, buǵan deıin depýtatyń uly Nurasyl Bolat probatsııalyq baqylaýdy elemegeni úshin bas bostandyǵynan aıyrylýy múmkin ekeni aıtylǵan.