Ulybrıtanııadaǵy Jalpy saılaý kúni bekitildi

<p>LONDON. KAZINFORM &ndash; Ulybrıtanııa premer-mınıstri Rıshı Sýnak bılik partııasyna daýys berý kúnin 4 shilde dep bekitti. Ol Charlz III-shi patshadan saıası naýqan aldynda resmı talaptarǵa sáıkes parlamentti taratýdy suraǵanyn atap ótti, dep habarlaıdy Kazinform-nyń osy eldegi tilshisi.</p>

«Búgin men Uly mártebelimen parlamentti taratý týraly sóılestim. Patsha bul ótinishimdi qanaǵattandyrdy jáne 4 shildede Jalpy saılaý ótedi», — dep ol qatty jańbyr astynda turyp, Daýnıng-strıttegi rezıdentsııanyń aldynda málimdeme jasady.

Qysqa mátindi baıandamasynda premer óz úkimetiniń qıyn kezeńde qol jetkizgen jetistikterin maqtan tutatynyn atap ótti.

«Ekonomıkalyq turaqtylyq — kez-kelgen tabystyń negizi. Brıtan ekonomıkasy qarqyndy ósýdi jalǵastyryp jatyr jáne ınflıatsııa qalypty deńgeıge oraldy», — dedi ol.

Sýnaktyń aıtýynsha, alda ne bolatyny beımálim, biraq onyń jáne onyń úkimetiniń naqty jospary bar. Ol sondaı-aq leıborısterdi synǵa alyp, kelesi birneshe apta ishinde árbir daýys úshin kúresetinin málimdedi.

Oppozıtsııalyq Leıborıster partııasynyń kóshbasshysy Kır Starmer bolsa, bul Ulybrıtanııa asyǵa kútken kún dep ún qosty. Onyń aıtýynsha, el men qoǵamdy ózgertetin ýaqyt kelip jetti.

Konservatorlar qoǵamdyq pikir zertteýlerine sáıkes leıborısterden aıtarlyqtaı artta qalyp otyr. Bılik partııasy 2022 jyldyń sońynda rekordtyq deńgeıge jetken ınflıatsııany yryqqa kóndirgenine qaramastan kópshiliktiń betin beri qarata almady.