Ulybrıtanııadaǵy otandastarymyz daýys berip jatyr

<p>LONDON. KAZINFORM &ndash; <strong>Ulybrıtanııadaǵy Qazaqstan elshiligi janynda ornalasqan saılaý ýchaskesinde referendým endi bastaldy.</strong><strong> Óıtkeni London Astana ýaqytynan 4 saǵat artta, dep habarlaıdy Kazinform tilshisi.</strong></p>

№ 376 saılaý ýchaskesi Qazaqstannyń Ulybrıtanııadaǵy Elshiliginiń ǵımaratynda ornalasqan. Ýchaskede Qazaqstannyń jáne Ulybrıtanııanyń týlary, ortasynda daýys berý jáshigi tur. Saılaý komıssııasynyń músheleri erejelerdiń tolyq saqtalýyn qamtamasyz etip otyr. 

Foto: Ǵalymjan Qaramanuly /Kazinform

Jalpy birqatar otandasymyz daýys berýge nıetti ekendikterin aıtyp, ýchaskege aldyn ala tirkelgen. Basym kópshiligi stýdentter qaýymy jáne olardyń belsendiligi óte joǵary. Birinshi bolyp kelgen daýys berýshige elshilik tarapynan syılyq berildi.

«Men birinshi kýrs stýdentimin. Vestmınster ýnıversıtetinde IT mamandyǵy boıynsha bilim alyp jatyrmyn. Búgin ómirimde birinshi ret jáne Londonda birinshi bolyp daýys berýge keldim. Konstıtýtsııalyq quqyǵymdy júzege asyrý men úshin úlken mártebe», - dedi Álisher Qaraman.

Daýys berýshilerdiń qatarynda tek Ulybrıtanııa qazaqtary ǵana emes, Redıng, Manchester, Aberdın, Glazgo qalalarynda ýaqytsha nemese turaqty turyp jatqan otandastarymyz, osynda saıahattap júrgen týrıster de kóp.

Ádette daýys berýshilerdiń sany tańerteńgi ýaqytqa qaraǵanda túske taman artady. Óıtkeni Ulybrıtanııanyń túkpir-túkpirinen jınalǵan qazaqstandyqtar Londonǵa sol kezde jetedi.

Elshilik daýys berý protsesine qatysýshylardyń qaýipsizdigin qamtamasyz etý maqsatynda jergilikti polıtsııamen yntymaqtastyqta jumys istep jatyr.

Tańerteń 7-de ashylǵan daýys berý ýchaskesi keshki 8-ge deıin jalǵasady. Odan keıin saılaý komıssııasynyń músheleri daýystardy sanaý protsesine kirisedi. Ýchaske jabylǵannan keıin 1-2 saǵattyń kóleminde Londondaǵy referendým nátıjeleri belgili bolady. Saıası mańyzy bar naýqannyń aldyn ala nátıjeleri erteń halyqqa jarııa etilmek.