Ulybrıtanııada jalpy ishki ónim kórsetkishi tómendedi

<p>Ulybrıtanııa ekonomısteri úshin kútpegen jańalyq. El ekonomıkasy qazan aıynda qaıta qysqardy. Bul azdaı, jańa jylda jaryq pen jylý aqysy taǵy qymbattaıtyn boldy. Ol azyq-túlik ónimderi men qyzmet quny da ósedi degen sóz, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.&nbsp;</p>

Ulybrıtanııada ómir súrý quny qymbattap, halyqtyń qaltasyn qaqty. Inflıatsııany tejeý úshin kóterilgen paıyzdyq mólsherleme qazir 10 jyldan beri bolmaǵan óte joǵary deńgeıde. Rojdestvo merekesi qarsańynda bir-birine syılyq syılap úırengen aǵylshyndarda endi aqsha joq. Taýarlaryna túrli jeńildikter usynsa da, dúkenderdiń saýdasy júrmeı jatyr.

«Qazir halyq maıda-shúıde zat satyp alýǵa aqsha tappaı qınalyp jatyr. Sońǵy zertteýlerge sáıkes jappaı satylym bolatyn «Jomart juma» naýqany kezinde byltyr suranystyń 61 paıyzǵa, bıyl 44 paıyzǵa azaıǵanyn ańǵaryp otyrmyz», - deıdi tutyný salasy boıynsha sarapshy Jasmın Bırtlz.

Ulybrıtanııanyń jalpy ishki ónim kórsetkishi qyrkúıekpen salystyrǵanda 0,3 paıyzǵa tómendedi. Ulttyq statıstıka basqarmasynyń málimetterine sáıkes buǵan aýa raıynyń qolaısyzdyǵy áser etse kerek. Sebebi qurylys jumystary turalap, bólshek saýda, qyzmet kórsetý jáne týrızm salalarynda irkilis bolǵan. Bıliktegiler bolashaǵymyz bulyńǵyr dep dabyl qaqqandardy jarqyn jaqta ómir súrýge shaqyryp otyr.

«Óz-ózimizge degen senimdiligimizdi joǵaltpaýymyz kerek. Biz Breksıtti bastan keshirdik. Bul parlament jumysynyń toqtaýyna, saıası turǵyda óte qıyn kezeńderge alyp keldi. Brıtan halqy Eýroodaqtan shyǵamyz dep daýys bergenimen parlament bul birlestik elderimen ortaq mámilege kele almaı abdyrap qaldy. Saldarynan Tereza Meıdiń úkimeti bılikten ketti. Odan keıin pandemııa bastaldy», - deıdi Ulybrıtanııanyń Qarjy mınıstri Djeremı Hant.

Ekonomıkalyq qıyndyqtar saldarynan sterlıng fýnty da álsiredi. Dollar men eýroǵa shaqqandaǵy baǵamy ol eń tómengi mejege jetti. Bul jaǵdaı retsessııa qaýpin arttyrady jáne Anglııa bankiniń paıyzdyq mólsherlemeni joǵary deńgeıde ustap turýǵa májbúrleıdi dedi mamandar. Shynymen de solaı boldy. Ulybrıtanııanyń bas qarjy ınstıtýty mólsherlemeni sol kúıinde qaldyrýdy sheshti.

«Dál qazir, meniń oıymsha, paıyzdyq mólsherlemeni tómendetý týraly áńgime bastaý áli erte. Biz aldymen jaqsy nátıjeler kórsetýimiz kerek. Men jetistikterdi kórip qýanamyn, biraq olar azdyq etedi. Sondyqtan jaqyn arada mólsherlemeni tómendete almaımyz», - deıdi Anglııa Bankiniń basshysy Endrıý Beılı.

Brıtan úkimeti ınflıatsııa deńgeıin 2 paıyzǵa deıin tómendetýdi josparlaǵan edi. Biraq ol 11 paıyzdan 4,5 paıyzǵa deıin ǵana azaıdy. Anglııa bankiniń ókilderi ekonomıkalyq kórsetkishter turaqtalǵan kezde ǵana áreket etýge bel býyp otyr. AQSh-tyń Federaldyq rezervtik júıesi kelesi jyly mólsherlemeni tómendetýdi mejelegenimen Ulybrıtanııada jaǵdaı ázirge ózgermeıdi.

«Meniń oıymsha, ınflıatsııanyń qazirgi deńgeıin ustap turý basty másele bolyp qala beredi. Biz byltyr kóp máselege tap boldyq. Sonlyqtan bizdegi ahýaldy AQSh-taǵy jaǵdaımen salystyrýǵa kelmeıdi», - deıdi Anglııa Bankiniń basshysy Endrıý Beılı.

Qylyshyn súıretip qys kelgende jaryq pen jylýdyń baǵasy óskeli tur. Energetıkaǵa jaýapty mekemeniń esepteýinshe, jańa jyldan bastap árbir otbasynyń bir jyldyq ortasha shyǵyny 5 paıyzǵa artady. Qymbatshylyq Anglııa, Ýels jáne Shotlandııadaǵy jıyrma toǵyz mıllıon otbasyna áser etpek.

Baǵa tek Soltústik Irlandııada ózgermeıdi. Byltyr da dál osyndaı jaǵdaı bolǵanda, úkimet halyqqa qarjylaı qoldaý bildirse, bıyl ondaı kómek kórsetilmeıin dep tur. Táýelsiz Bıýdjettik jaýapkershilik basqarmasynyń esepteýinshe, ınflıatsııany tejeý úshin keminde úsh-tórt jyl kerek.

⠀