Ulybrıtanııada saılaýaldy naýqan bastaldy

<p>ASTANA. KAZINFORM - Bılik partııasyndaǵylar halyqtyń kóńilinen shyǵý úshin salyqty tómendetýge deıin baryp otyr. Biraq bul saılaýshylardyń betin beri qarata ma? 14 jyl el basqaryp, ekonomıkany retsessııaǵa ushyratqan konservatorlar bıyl bılikpen qosh aıtysýy múmkin, dep habarlaıdy Kazinform-nyń osy eldegi menshikti tilshisi Ǵalymjan Qaramanuly.</p>

Kóktemgi bıýdjetti jarııa etpes buryn Qarjy mınıstri áriptesterimen birge Daýnıng strıttegi keńsesiniń aldyna shyǵyp, dástúrden jańylmaı qolyna qyzyl dıplomat ustap, fotoǵa tústi. Djeremı Hant Konservatıvtik partııany aldaǵy saılaýda jeńilisten qutqarý úshin salyqty tómendetindigi týraly ýáde etti.

“6 sáýirden bastap, eńbek adamdary men jeke kásibi barlardyń ulttyq saqtandyrýǵa tóleıtin salyǵy taǵy eki paıyzdyq tarmaqqa azaıady. ıAǵnı, jaldanyp jumys isteıtin qyzmetkerler jylyna 450, al jeke kásipker 350 sterlıng fýntyn únemdeı alady”, - deıdi Ulybrıtanııanyń Qarjy mınıstri Djeremı Hant.

Ulybrıtanııada salyqtyń eki túri bar. Birinshisi – tabys, ekinshisi – ulttyq saqtandyrý salyǵy. Jınalǵan aqsha memlekettik qyzmetterdi qarjylandyrýǵa jumsalady. Salyq kólemi kemigenimen, ol báribir rekordtyq joǵary deńgeıde tur, deıdi oppozıtsııadaǵylar. Leıborıster partııasy salyqty Torılerdiń ózderi kótergenin aıtyp, nalyp otyr.

“Ulybrıtanııa ekonomıkasy retsessııaǵa kirdi. Halyqtyń tózimi taýsyldy. Bılik qansha tyryssa da, salyq júktemesi sońǵy 70 jylda bolmaǵan eń joǵary deńgeıde tur. Konservatorlar bir qolmen berip, ekinshi qolmen bergeninen de kóp alýǵa úırengen. Saılaýǵa deıin qandaı áreketke barmasyn jaǵdaı ózgermeıdi”, - deıdi Leıborıster partııasynyń kóshbasshysy Kır Starmer.

Saýalnama nátıjelerine sáıkes Konservatorlar Leıborıster partııasynan anaǵurlym artta keledi. Reıtıngileri sońǵy 50 jylda bolmaǵan deńgeıge túsip ketken.

“Salyq Ekinshi dúnıejúzilik soǵystan bergi eń joǵary deńgeıde. Inflıatsııa sharyqtap turǵan ýaqytta salyqty shamaly ǵana tómendetý shyn máninde eshteńeni ózgertpeıdi”, - deıdi London turǵyny.

“Barlyǵy qymbattap jatyr. Kúnkóris qıyndap ketti. Ómir súrý múmkin bolmaı barady. Menińshe, alysty oılap, máselelerdi sheshý kerek. Qaıta saılaný úshin bir-eki nárseni ǵana ózgertý durys emes”, - dep ún qosty taǵy bir azamat.

Hant sonymen qatar, veıpterge jáne Ulybrıtanııadan basqa memlekette tabys tabatyn rezıdent emes jeke tulǵalarǵa jańa salyq túrin salmaqshy. Leıborıster Jalpy saılaýdy ótkizý kúnin 2 mamyr dep bekitip, bılikpen qosh aıtysýlaryn talap etip otyr.