Ulybrıtanııada ólgennen keıin aǵzasyn alýǵa ruqsat beretin zańnyń arqasynda myńdaǵan jan aman qaldy

<p>Ulybrıtanııada jyl saıyn 700-den astam adam transpantologııalyq operatsııanyń arqasynda aman qalady. Sebebi bul elde mindetti aǵza donorlyǵy týraly zań bar. Qujatqa sáıkes azamattar tiri kezinde ózi tyıym salmasa, qaıtys bolǵan jaǵdaıda aǵzalary avtomatty túrde muqtaj naýqastarǵa beriledi, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

Donordyń biri Kıra Boll 9 jasynda kólik apatynan qaıtys bolǵan. Ata-anasy qaıǵy jutyp qınalsa da, qyzynyń aǵzasynyń múshelerin muqtaj naýqas jandarǵa berýge kelisken.

«Kırany joǵaltyp alǵanymyz óte ókinishti. Ony aman alyp qalý múmkin bolmady. Biraq qyzym 4 adamǵa ómir syılady. Osy kóńilge medeý, janǵa jubanysh», — deıdi Kıranyń anasy Loanna Boll.

Kıranyń arqasynda ajaldan aman qalǵandardyń biri — 9 jasar Maks Djonson.

Vırýstyq ınfektsııadan keıin júrek talmasyna dýshar bolǵan oǵan Kıranyń judyryqtaı júregi salyndy. Ata ananyń úzilgen úmiti jalǵandy.

«Donorǵa degen alǵysymyz sheksiz. Sózben aıtyp jetkizý múmkin emes. Ata-anasy óte qıyn kezeńde basqalardyń ómiri týraly oılady. Bul erlik. Bizdiń balamyz qaıta ómirmen qaýyshty», — deıdi Makstyń anasy Emma Djons.

Bul oqıǵa Mindetti aǵza donorlyǵy týraly jańa zańnyń qabyldanýyna túrtki boldy.

Premer-mınıstr bastama kóterip, mańyzdy qujatqa qol qoıyldy. Jáne ony «Maks pen Kıra zańy» dep atady.

Sodan beri kenet qaıtys bolǵan adamnyń aǵza músheleri týysqandarynyń ruqsatynsyz muqtajdarǵa berilip júr. Eger marqum kózi tiri kezinde qarsy bolyp, bas tartpasa bolǵany.

«Qazir jaǵdaı múldem basqasha. Halyq arasynda jańa mádenıet qalyptasty. Búkil ulttyń aǵza donorlyǵyna degen kózqarasy ózgerdi jáne donor bolýdy abyroı sanaıtyndar kóp», — deıdi Ulybrıtanııa Ulttyq densaýlyq saqtaý qyzmeti transplantologııany damytý bóliminiń jetekshisi Kler Vıllıment.

Statıstıkaǵa sáıkes ótken jyly 4,5 myńǵa jýyq naýqas tiri nemese qaıtys bolǵan donordyń aǵzasyn paıdalanyp, aman qalǵan. Bul aldyńǵy jylmen salystyrǵanda bes paıyzǵa kóp.

Deıturǵanmen, transplantatsııany saryla kútip júrgen 7000-nan astam naýqas bar.