Ulybrıtanııada qazaq tilin úırengisi keletin stýdentterdiń sany artyp keledi

<p>Ulybrıtanııada Qazaqstan Respýblıkasynyń Ǵylym jáne joǵary bilim mınıstrligi men Volfson kolledji stýdentterge qazaq tilin úıretý týraly arnaıy kelisimge qol qoıdy. Budan bólek taraptar álemge áıgili joǵary oqý ornynyń stýdentterin bizdiń elge taǵylymdaǵa jiberýge ýaǵdalasty, dep habarlaıdy Kazinform-nyń sol eldegi menshikti tilshisi Ǵalymjan Qaramanuly.</p>

Oksford ýnıversıtetinde birneshe shetel tiliniń arnaıy oqý ortalyǵy bar. Ásirese stýdentterdiń túrkitildes memleketterdiń baı mádenıeti men salt-dástúrlerine degen qyzyǵýshylyǵy erekshe. Aldaǵy ýaqytta álemniń túkpir-túkpirinen kelgen jastar uly Abaı tilin úırene bastaıdy.

Foto: Ǵalymjan Qaramanuly/Kazinform

“Oksford ýnıversıtetinde biz dástúrli túrde eshqashan qazaq tilin oqytpaǵan edik. Qazaqstan týraly kóbirek bilgisi jáne úırengisi keletin stýdentterdiń sany artyp keledi. Sondyqtan Volfson kolledji búgin qazaqstandyq Ǵylym jáne joǵary bilim mınıstrligimen memorandýmǵa qol qoıdy. Sonymen qatar bilim qýǵan qazaq ǵalymdaryn Oksford ýnıversıtetine tartý máselesi de qarastyrylyp jatyr”, deıdi Wolfson kolledjiniń prezıdenti Tım Hıtchens.

Elimizdiń strategııalyq jaǵdaıy, Eýrazııanyń ortalyǵynda oryn alýy Oksford ǵalymdarynyń qazaq tiline degen qyzyǵýshylyǵyn arttyrǵan. Álemniń qozǵaýshy kúshi Azııaǵa qaraı jyljyǵan zamanda sol qurlyqtyń júreginde ornalasqan Qazaqstanmen baılanysty nyǵaıtý mańyzdy deıdi olar. Joba Ahmet Baıtursynuly atyndaǵy Til bilimi ınstıtýtymen birlesip júrgiziledi.

Foto: Ǵalymjan Qaramanuly/Kazinform

“Oksford ýnıversıtin támamdaǵan stýdentter Qazaqstanǵa baryp, ınstıtýtta sabaqtarǵa qatysyp úlgerdi. Endi biz osynda oqytatyn oqý baǵdarlamasyn qurý baǵytynda jumys istep jatyrmyz. Azııa jáne Taıaý Shyǵysty zertteý fakýlteti bul múmkindikke dán rıza. Óıtkeni Oksford qazaq tilin úıretetin Ulybrıtanııadaǵy birinshi jáne jalǵyz oqý orny bolǵaly tur”, deıdi Oksford ýnıversıteti janyndaǵy “Bir sóz” bastamasynyń dırektory Leıla Nadjafzada.

Tildik kýrstardy qarjylandyrý ýnıversıtettiń túriktildes tilderge arnalǵan arnaıy baǵdarlamasy esebinen júrgiziledi. Qanatqaqty jobanyń aýqymy keńeıgen kezde demeýshiler tarapynan qosymsha qarjy kózderi qarastyrylmaq. Kelisimge qol qoıý kezinde mınıstrlik jáne ýnıversıtet ókilderi ózara tájirıbe almasý máselelerin de qozǵady.

Foto: Ǵalymjan Qaramanuly/Kazinform

“Oksford ýnıversıtetiniń zertteýshileri men PhD, magıstratýra oqýshylary endi Qazaqstanǵa taǵylymdaǵa kelýge daıyn. Ál-Farabı atyndaǵy jáne Abaı atyndaǵy ulttyq ýnıversıtetteriniń, Ahmet Baıtursynov atyndaǵy Tiltaný ýnıversıtetterdiń negizinde ǵylymı, tildik taǵylymdamalar júzege asyrylatyn bolady”, deıdi QR Ǵylym jáne joǵary bilim mınıstri Saıasat Nurbek.

Til kýrstary joǵary deńgeıde ótýi úshin tyńǵylyqty daıyndyq qajet. Bilim sapasyna erekshe mán beretin Oksford ýnıversıteti qazaq tilin úırengisi keletin alǵashqy stýdentterin qabyldaýdy kelesi akademııalyq oqý jylynda bastamaq.