Ulybrıtanııada balalarǵa áleýmettik jelide otyrýǵa tyıym salynýy múmkin

<p>Ulybrıtanııa úkimeti 16 jasqa tolmaǵan balalarǵa áleýmettik jelilerde otyrýǵa tyıym salýy múmkin. Bıliktegiler jas jetkinshekterdi ǵalamtordaǵy zııandy kontentten qorǵaǵysy keledi, dep habarlaıdy Kazinform tilshisi.</p>

Úkimet buǵan deıin Internettegi qaýipsizdik týraly zań qabyldap, ony buzǵan kompanııalarǵa iri kólemde aıyppul salýdy uıǵardy. Balalarǵa zııandy kontent kórsetkeni úshin platformalar jahandyq kirisiniń 10 paıyzyn tóleýge mindetteledi. Biraq bul azdyq etedi dep sheshken bıliktegiler endi 16 jasqa tolmaǵandarǵa áleýmettik jelilerdi paıdalanýǵa shekteý qoımaq.

“Qazir osy másele boıynsha aqyldasyp jatyrmyz. Bolashaqta balalar áleýmettik jelilerdi paıdalanbas buryn ata-anasynyń ruqsaty suralatyn bolady”, - deıdi Ulybrıtanııanyń Ǵylym mınıstri Endrıý Grıffıt.

Instagram men Pınterest jelilerinen zııandy kontent kórip, óz-ózine qol salǵan 14 jasar Mollı Rasseldiń otbasy qaıyrymdylyq qoryn ashqan bolatyn. Qor qyzmetkerleriniń pikirinshe, tele-radıo efıri men ınternettegi aqparatty qadaǵalaýmen aınalysatyn Ofkom agenttigine qosymsha ókilettikter berý kerek.

“Áleýmettik jeliler táýeldilik týǵyzyp, shyndyqqa janaspaıtyn álemge jeteleıdi. Ol jasóspirimderge arnalǵan oryn emes. Sondyqtan retteýshi organnyń qyzmetin kúsheıtý kerek”, - deıdi qoǵam belsendisi Bıbon Kıdron.

Qaıyrymdylyq uıymdary men belsendiler 2017 jyldan beri ǵalamtordaǵy qaýipti kontentpen qatań kúres júrgizýge shaqyryp keledi. Arnaıy zań kúzde qabyldanbas buryn óte uzaq tekserýden ótken bolatyn. Balalardy qorǵaýǵa arnalǵan qaıyrymdylyq uıymynyń pikirinshe, sońǵy alty jyl ishinde ǵalamtorda balalar ómirine qaýip tóndirgen 35 myńǵa jýyq qylmys tirkelgen.