Ulybrıtanııa: Jańa úkimet — eski problemalar

<p>LONDON. KAZINFORM — Ulybrıtanııanyń jańa premer-mınıstri zańsyz mıgranttardy Rýandaǵa jibermeıtin boldy. Kır Starmer mıllıondaǵan sterlıng fýnty jumsalǵan, biraq júzege aspaǵan jospardan bas tartyp otyr. Onyń ornyna úkimet basshysy jańa shekaralyq baqylaý qyzmetin qurmaq. Biraq bul bastama baspana surap, bas saýǵalaǵan bosqyndarǵa tosqaýyl bola ala ma?</p>

Baspana suraýshylardy Rýandaǵa jetkizýi tıis alǵashqy reıs eki jyl buryn ushýy kerek-ti. Biraq Adam quqyqtary jónindegi Eýropalyq sot pen Ulybrıtanııanyń Joǵarǵy soty halyqaralyq zańdarǵa qaıshy dep bastamany buǵattap tastady.

Konservatorlar zańdy aınalyp ótýdiń jolyn tapqanymen, saılaýda jeńilip, josparlaryn júzege asyra almaı qaldy. Jańa premer-mınıstr, buǵan deıin ózi ýáde etkendeı, deportatsııalaý baǵdarlamasyn toqtatty.

«Qarańyz, Rýanda jospary júzege aspaı turyp, onyń tıimsiz ekeni belgili boldy. Ol zańsyz kóshi-qondy tejegen emes jáne tejemeıdi de. Osy jyldyń alǵashqy alty aıynda Brıtanııaǵa kelgen bosqyndardyń sany kóp jáne rekordtyq deńgeıge jetip otyr», -deıdi Ulybrıtanııanyń premer-mınıstri Kır Starmer.

Starmer basshylyq etetin úkimet máseleni sheshý úshin bosqyndardy zańsyz tasymaldaýmen aınalysatyn qylmystyq toptarǵa jiti nazar aýdarmaq.

Ol úshin polıtsııa, ishki barlaý basqarmasy jáne prokýratýra qyzmetkerleri Ulybrıtanııada jumys isteıtin halyqaralyq agenttiktermen birigip, shekara qaýipsizdiginiń qolbasshylyǵy qurylady.

Al konservatorlardyń jobaǵa jumsaǵan 300 mıllıon fýnttan astam qarajaty muqııat zertteledi.

«Men qarajattyń tıimdi jumsalýyn, zańnamanyń oryndalýyn jiti tekserip, aýdıt júrgizemin. Jáne nátıjesi týraly parlament aldynda esep beremin. Shekaralarymyzdyń qaýipsizdigin nyǵaıtýǵa bólingen aqshanyń durys paıdalanylǵanyna kóz jetkizýimiz kerek», -deıdi Ulybrıtanııanyń ishki ister mınıstri Ivett Kýper.

Rýanda Brıtan úkimetiniń suranystaryn tolyq qanaǵattandyrǵanyn jáne aqshany túgel jumsap tastaǵanyn aıtty.

«Mıgranttardy ýaqytsha ornalastyrý úshin baspana daıyndalyp, tipti bosqyndarǵa arnalǵan úılerdiń qurylysy bastalyp ketti. Qol qoıylǵan kelisim-shartta jospar sátsizdikke ushyrasa, aqsha qaıtarylady dep aıtylmaǵan, ” deıdi afrıkalyq sheneýnikter.

«Shyndyǵynda, kelisimdi Rýanda emes, Ulybrıtanııa úkimeti buzdy. Bul qarajat elimizge berilgen nesıe emes. Naqty áreketterdi júzege asyrý úshin Rýandaǵa jiberilgen aqsha boldy. Mindettemelerimizdi oryndadyq. Qarajatty qaıtarýǵa eshqandaı negiz joq», -deıdi Rýanda úkimeti resmı ókiliniń orynbasary Alen Mýkýralında.

Zańsyz kóshi-qon ózekti taqyryp bolǵandyqtan, jańa úkimetke qarsy qysym kúsheıdi. Sondyqtan Leıborıster qalaı bolǵanda da shaǵyn qaıyqtarmen La-Manshty kesip ótetin ondaǵan myń adamǵa tosqaýyl qoıýy kerek.

Rýanda zańynyń negizgi avtory jáne Ulybrıtanııa Іshki ister mınıstrliginiń burynǵy basshysy leıborısterdiń usynysyna narazylyǵyn bildirdi.

Aıtpaqshy, Sýella Braverman Torı kóshbasshylyǵyna úmitkerlerdiń qatarynda, óıtkeni Rıshı Sýnak qyzmetinen ketýdi josparlap otyr.

«Jyldar boıy jasalǵan qajyrly eńbek, parlamenttik aktiler jáne mıllıondaǵan sterlıng fýnty zaıa ketkendeı. Joba sátti júzege asqanda óz jemisin berer edi. Biraq, siz bilesiz be, bizdi endi kóp kedergi kútip tur. Konservatıvtik partııa buǵan qarsy áreket etýi kerek», — deıdi Ulybrıtanııanyń burynǵy Іshki ister mınıstri Sýella Braverman.

Jyl basynan beri 13 500-den astam adam basyn qaýip-qaterge tigip, Brıtan jaǵalaýyna úrlemeli qaıyqpen júzip kelgen.

Biraq qazir qatty jel turyp, teńiz mazasyndanǵan soń olardyń sany azaıyp tur.

Sheneýnikter munyń uzaqqa sozylmaıtynyn jaqsy túsinedi. Óıtkeni Frantsııada shekarany kesip ótkisi kelip, eleńdeýmen turǵandar kóp.

Suranys bolǵandyqtan kóshi-qon daǵdarysy jaqyn arada sheshimin tabady dep aıtý qıyn.