Ulybrıtanııa sońǵy kómir elektr stantsııasyn japty

<p>LONDON. KAZINFORM - Ulybrıtanııa kómirden elektr energııasyn óndirýdi toqtatyp, qazba otynyna degen 142 jyldyq táýeldiligin aıaqtady. Eldegi sońǵy jumys istep turǵan Retklıff-on-Sor kómir elektr stantsııasy jumysyn toqtatty. Bul &ndash; Ulybrıtanııanyń klımattyń ózgerýine qarsy kúres jolyndaǵy mańyzdy qadamdarynyń biri, dep habarlaıdy Kazinform tilshisi.</p>

Álemdegi alǵashqy kómir elektr stantsııasy – Holborn Vıadýkty 1882 jyly Londonda Tomas Edıson salǵan. Bul tarıhı oqıǵa Ulybrıtanııada ónerkásiptik revolıýtsııa bastaýǵa yqpal etti. 20-shy ǵasyrdyń birinshi jartysynda kómir eldiń barlyq derlik elektr energııasyn qamtamasyz etti. Tipti 2012 jyly bul qazba otyny Ulybrıtanııanyń 39% qýat kózin quraǵan bolatyn.

Alaıda klımattyń ózgerýine qatysty ǵylymı dálelder kóbeıgen saıyn, kómir lastaýshy qýat kózi retinde qarastyryldy. Sóıtip Ulybrıtanııa úkimeti 2015 jyly kómir qýatyn on jyl ishinde toqtatýǵa ýáde berdi.

Eń uzaq qyzmet etken Qorshaǵan orta mınıstri Lord Deben bul kúndi «erekshe kún» dep atap, Ulybrıtanııa kómirge táýeldi memleket bolǵanyn jáne qazir ony birinshi bolyp toqtatyp jatqanyn atap ótti.

Kómirden tolyǵymen bas tartý bastamasy tez júzege asty. 2010 jyly jańartylatyn energııa kózderi Ulybrıtanııa elektr energııasynyń tek 7%-yn ǵana qamtamasyz etse, 2024 jyly bul kórsetkish 50%-dan asyp, kómir jaǵýdy birjolata toqtatýǵa múmkindik berdi. Jasyl energııaǵa kóshýdiń sátti júzege asqany sonshalyq kómir elektr stantsııalaryn jabý jospary mejeden buryn oryndaldy.