«Uly Jibek joly» týrnıri: qazaqstandyq boksshylar 3 altyn aldy

<p>ASTANA. KAZINFORM &mdash; Ázerbaıjan astanasy Baký qalasynda bokstan ótken &laquo;Uly Jibek joly&raquo; halyqaralyq týrnırinde Qazaqstan quramasy 3 altyn, 2 kúmis, 2 qola medal jeńip aldy.</p>

Qazaqstan qorjynyna alǵashqy altyndy 60 kg salmaqta Talǵat Syrymbetov saldy.

Talǵat fınalda ázerbaıjandyq Azrar Babırovty úsh raýnd boıy tyqsyryp, tóreshilerdiń biraýyzdan sheshimimen jeńdi.

Sondaı-aq 71 kg salmaqta taǵy bir otandasymyz Darhan Dúısebaı sońǵy básekede ózbekstandyq Bekzod Hamıdovtan basym tústi.

Bul kúni sensatsııa jasaǵan Saǵyndyq Toǵambaı boldy. Ol 92 kg salmaqta 2020 jylǵy Tokıo olımpıadasynyń qola júldegeri, 2021 jylǵy álem chempıony, 2023 jylǵy álem birinshiliginiń kúmis júldegeri, Ázerbaıjan atynan shyǵyp júrgen ataqty kýbalyq Loren Berto Alfonso Domıngesti úsh raýnd boıy qaqyrata uryp, tóreshilerdiń biraýyzdan sheshimimen qapy qaldyrdy.

Álem chempıony Temirtas Júsipov 48 kg salmaqta jergilikti boksshy Hasan Malıkovpen qolǵap túıistirdi. Tóreshiler H.Malıkov utty dep tapty.

Sol sekildi Tımýr Qabdesh 54 kg salmaqta kúmis medaldi qanaǵat tutty. Ózbekstandyq Hýjanazar Nortojıevpen aıqasta ekinshi raýndta Tımýr qarsylasyn nokdaýnǵa jibergenimen, úshinshi kezeńde qabaǵy jaryldy. Sonyń saldarynan jekpe-jek toqtatylyp, jeńis ózbek boksshysyna berildi.

Baqtııar Smaǵulov (67 kg) pen Bekzat Tańatar (86 kg) qola júldege ıe boldy.

Eske sala keteıik, budan buryn «Uly Jibek joly» týrnırinde 5 boksshymyzdyń altynǵa talasatynyn jazǵan bolatynbyz.