«Uly dala joryǵy» bıyl Petropavldaǵy Abylaı han rezıdentsııasynan bastalady

<p>PETROPAVL. KAZINFORM &ndash; V Dúnıejúzilik kóshpendiler oıyndary qarsańynda ótetin &laquo;Uly Dala Joryǵy&raquo; biregeı marafon-báıgesiniń respýblıkalyq irikteý kezeńiniń bastalý kúni belgili boldy.</p>

«JORYQ» respýblıkalyq at sporty federatsııasy baspasóz qyzmetiniń málimetinshe, 11 naýryzda federatsııa prezıdenti Baqytjan Turlybekov Soltústik Qazaqstan oblysynyń ákimi Ǵaýez Nurmuhambetovpen kezdesti.

Foto: «JORYQ» respýblıkalyq at sporty federatsııasy

Kezdesý barysynda Ulttyq sport túrleri qaýymdastyǵynyń qoldaýymen ótetin marafon-báıgeniń uıymdastyrý máseleleri talqylandy.

Sondaı-aq jıyn barysynda «Uly Dala Joryǵy» respýblıkalyq irikteý týrynyń ótetin orny men bastalý kúni de belgilendi.

Bıyl marafon-báıgeniń bastalý orny retinde Petropavldaǵy Abylaı han mýzeı kesheni-rezıdentsııasy belgilenip otyr. Joba 12 mamyrda bastalyp, 17 mamyrda Astanada aıaqtalady. Býrabaı kýrorttyq aımaǵynyń, Botaı men Bozoq kóne mekenderiniń kórikti jerlerin basyp ótetin marafon-báıgeniń jalpy qashyqtyǵy 500 shaqyrym bolmaq.

Foto: «JORYQ» respýblıkalyq at sporty federatsııasy

Úzdik úshtikke engen jeńimpaz komandalar qyrkúıek aıyna josparlanǵan «Uly Dala Joryǵy» halyqaralyq týryna lıtsenzııa alady.

Qazirgi tańda oblystarda aımaqtyq irikteý týrlary júrip jatyr, olardyń jeńimpazdary ulttyq irikteý týryna joldama alady.

Respýblıkalyq irikteý kezeńinde ornatylǵan eń úzdik jetistikter Qazaqstannyń rekordtar kitabyna (KINES) enbek.