Úleskerlik qurylys: 51 problemaly nysan bar

<p>ASTANA. KAZINFORM - QR Ónerkásip jáne qurylys mınıstrligi elimizde úlestik qurylys boıynsha problemaly nysandar qaı qalalarda kóp tirkelgenin málim etti.</p>

«Qazir úlestik qatysýy bar 11 óńirde 51 problemaly obekt bar. Bul turǵyda Astana qalasynda – 9, Almaty qalasynda – 4, Qaraǵandy oblysynda – 3, Aqtóbe oblysynda – 11, Aqmola oblysynda – 4, Atyraý oblysynda – 6, Mańǵystaý oblysynda - 6, Soltústik Qazaqstan oblysynda – 1, Shyǵys Qazaqstan oblysynda - 3, Pavlodar oblysynda - 1, sondaı-aq Almaty oblysynda 3 nysan tirkelgen», - delingen mınıstrliktiń Kazinform agenttigine bergen jaýabynda.

Úlestik qurylysta jańa problemaly nysandar jáne zańnamany aınalyp ótý úshin jasalatyn sharttardyń týyndaýyna jol
bermeý maqsatynda Ónerkásip jáne qurylys mınıstrligi memlekettik retteýdi kúsheıtý jóninde mynadaı túzetýler ázirledi:

- aldyn ala sharttar jasasýǵa tyıym salý;
- úleskerlerdiń aqshasyn zańsyz tartqany úshin qurylysty odan ári toqtata turyp, aıyppul sanktsııalaryn (300-den 2000 AEK-ke deıin) ulǵaıtý;
- úleskerlerdiń aqshasyn tartýǵa ruqsaty joq jarnamaǵa tyıym salý;
- «Turǵyn úı qurylysyna úlestik qatysý týraly» QR Zańyn retteý salasynda «az qabatty qurylys» uǵymyn engizý;
- Úleskerlerdi qoldaý ortalyǵynyń jumys isteýin qamtamasyz etý.

«Atalǵan túzetýler paketi turǵyn úı qurylysyndaǵy úlestik qurylystyń jańa problemaly obektileriniń paıda bolý qaýpin azaıtýǵa kómektesedi», - dep atalyp ótken vedomstvo aqparatynda.

Osyǵan deıin úlestik qurylystaǵy máselelerdi sheshý jáne problemalyq obektilerdiń táýekelderin azaıtý maqsatynda qurylys salýshy men satyp alýshy arasynda shart jasasý protsesin tsıfrlandyrý jumystary júrgizildi. 

Byltyr Qazaqstan Turǵyn úı kompanııasy eldegi úlestik baspanalardyń kóleńkeli naryǵyna zertteý júrgizip, úlestik turǵyn úı keshenderiniń shamamen 68%-y zańsyz salynatynyn anyqtaǵany habarlandy.