Úleskerlerdiń aqshasyn qoldy etken qurylys fırmasynyń dırektory BAÁ-den Qazaqstanǵa ekstradıtsııalandy

ASTANA. QazAqparat - Búgin Bas prokýratýranyń qyzmetkerleri Birikken Arab Ámirlikterindegi Qazaqstan elshiliginiń qoldaýymen QR QK 176-babynyń 3-bóligi «b» tarmaqshasy (Senip tapsyrylǵan bóten múlikti ıelenip alý nemese ysyrap etý) boıynsha qylmys jasaǵany úshin izdeýdegi 45 jastaǵy Mırhat Álimbetovti BAÁ-den Astanaǵa jetkizdi, dep habarlaıdy Bas prokýratýranyń baspasóz qyzmeti.

Álimbetov «Kakadý» JShS-niń negizin qalaýshysy jáne dırektory bola otyryp, Astanada 2005-2008 jyldar aralyǵynda «Qypshaq» turǵyn-úı keshenin salý barysynda 397 043 330 teńge somasynda salymshylardyń aqshasyn jáne  434 541 991 teńge somasynda memlekettik qarajatty zańsyz ıemdengeni úshin aıyptalýda.

2012 jyly ol Dýbaı qalasynda ekeni anyqtaldy. 4 sáýirde BAÁ quqyq qorǵaý organdary aıyptalýshyny Qazaqstanǵa berý týraly sheshim shyǵardy.

Qazirgi ýaqytta Álimbetov Astana qalasynyń tergeý ızolıatoryna qamaýǵa alyndy, tergeýdi Astana qalasynyń ІІD júrgizýde.

Bas prokýratýra qylmys jasaǵany úshin shetelde jasyrynyp júrgen Qazaqstan azamattaryn ekstradıtsııalaýǵa baǵyttalǵan jumystardy júrgizýde. Shet memleketterdiń quzyrly organdarymen jasyrynyp júrgen qylmyskerlerdi qaıtarý jáne jasalǵan qylmystary úshin jazanyń bultartpastyǵyn qamtamasyz etý boıynsha belsendi yntymaqtastyq ornatylǵan.

Sońǵy bes jyl ishinde osy jumys aıasynda Qazaqstanǵa 349 adam berildi, 100-den astam suranystar shet memleketterdiń quzyretti organdarymen qarastyrylýda.

Qadaǵalaý organy  Qazaqstan azamattarynyń shet elderden berilýine qol jetkizýde, mysaly, tek sońǵy eki jyl ishinde Birikken Arab Ámirlikterinen 8 adam berildi, sondaı-aq Ispanııa, Portýgalııa, Rýmynııa, Shvetsııa, Bolgarııa, Germanııa jáne Fınlıandııadan da adamdar Qazaqstanǵa berilgen bolatyn.