Úleskerler máselesi 2016 jyly túpkilikti sheshiletin bolady - Ulttyq ekonomıka vıtse-mınıstri

ASTANA. QazAqparat - Qazaqstandaǵy úleskerler máselesi 2016 jyldyń birinshi toqsanyna qaraı túpkilikti sheshimin tabatyn bolady. Bul týraly búgin «Turǵyn úı qurylysyndaǵy úlestik qatysý týraly» zań jobasynyń tanystyrylymy barysynda Ulttyq ekonomıka vıtse-mınıstri Qaıyrbek Óskenbaev málim etti.

Vıtse-mınıstrdiń derekterine súıensek, 2007 jylǵy daǵdarys barysynda elimizde 450 turǵyn úı kesheni qurylys barysynda toqtap qalǵan. Sonyń saldarynan 68 117 úlesker japa shekken. Keıinnen memleket bul iske aralasyp, tıisti sheshimder qabyldady.

«Nátıjesinde barlyq másele sheshimin taýyp jatyr. Qazir 2097 úlesker qatysatyn 16 joba problemaly kúıinde tur. Biz bul máseleni udaıy baqylaýda ustap kelemiz. Sonyń ishinde 9 jobanyń qurylysy jaqyn aralyqta aıaqtalady. 7 nysannyń qurylysy júrip jatyr, barlyq máseleler 2016 jyldyń birinshi toqsanyna qaraı sheshimin tappaq», - dedi vıtse-mınıstr.

Onyń aıtýynsha, 2007 jylǵy daǵdarystan keıin úlestik qurylys týraly zań 2010 jyly qabyldanyp, onda úleskerler qarajatyn tartýǵa qatań sharalar qabyldanǵan.

«Sol jyldan beri úlestik qurylys boıynsha bir ǵana lıtsenzııa berilgenimen, ol paıdalanylmaı qaldy. Sondyqtan da, mamandar mundaı mehanızm qurylys salýshylar úshin qyzyqsyz ekenin alǵa tartady. Al kerisinshe, úlestik qatysýǵa qarapaıym azamattar tarapynan qyzyǵýshylyq joǵary bolyp otyr», - deıdi Q.Óskenbaev.