Úlesker qarajaty qurylysqa nóldik tsıkl aıaqtalǵanda ne úı qańqasy turǵyzylǵanda ǵana tartylýy tıis - Q.Óskenbaev

ASTANA. QazAqparat - Úleskerler qarajaty qurylysqa tek nóldik tsıkl aıaqtalǵannan keıin ne bolmasa úı qańqasy turǵyzylǵannan keıin tartylýy tıis. Májiliste tanystyrylǵan «Turǵyn úı qurylysyndaǵy úlestik qatysý týraly» zań jobasynda osyndaı norma qamtylyp otyr.

Ulttyq ekonomıka vıtse-mınıstri Qaıyrbek Óskenbaevtyń aıtýynsha, qujatta úlestik qurylystyń 2 jańa tetigi usynylyp otyr. Munyń biri - qarajatty tek nóldik tsıkldan soń tartý bolsa, ekinshisinde - úı qańqasy kóterilgennen soń tartylady.

«Birinshiden, qurylys salýshy óz qarajaty esebinen nóldik tsıkldi salý jáne kredıt berý týraly jáne ınjınırıngtik kompanııany tańdaý týraly banktiń oń sheshimin alýy tıis. Bul rette úleskerlerdiń jarnalary qurylys salýshynyń arnaıy shotyna aýdarylatyn bolady, olar ınjınırıngtik kompanııanyń qorytyndysy negizinde ǵana paıdalanylady. Ekinshi - qurylys salýshy óz qarajaty esebinen turǵyn ǵımarattyń qańqasyn salýy tıis. Eger ınjınırıngtik kompanııa úleskerlerdiń qarajatyn maqsatsyz paıdalanylsa, onyń mán-jaıy anyqtalǵanǵa deıin qurylys salýshynyń eseptik shoty boıynsha operatsııalardy toqtata turýǵa quqyly», - deıdi vıtse-mınıstr.

Budan bólek, zań jobasymen ınjınırıngtik kompanııaǵa qurylys barysyna, jobalyq-smetalyq qujattyń ózgerýine, úleskerler qarajatynyń maqsatty paıdalanylýyna baqylaý jáne qadaǵalaý júrgizý júktelmek.