Ulandyqtar kúsheıtilgen rejımde táýlik boıy kezekshilik atqaryp tur

<p>ASTANA. KAZINFORM &mdash; Astanada Shanhaı Yntymaqtastyq Uıymynyń (ShYU) mańyzdy halyqaralyq sammıti ótip jatyr. Oǵan ártúrli elderdiń memleket jáne úkimet basshylary jınaldy. Bul týraly QR Ulttyq ulanynyń baspasóz qyzmeti málim etti.&nbsp;</p>

Joǵary laýazymdy qonaqtardyń qoǵamdyq tártibi men qaýipsizdigin qamtamasyz etý maqsatynda Qazaqstan Respýblıkasy Ulttyq ulanynyń jeke quramy Іshki ister organdarynyń qyzmetkerlerimen birlesip, qala kóshelerinde táýlik boıy kezekshilik júrgizbek. Bul mindet tártip saqshylaryna joǵary jaýapkershilik júkteıdi.

— Qaýipsizdikti qamtamasyz etý — bizdiń birinshi kezektegi mindetimiz. Bul sammıt —memlekettik mańyzy bar is-shara. Biz kúsh-qýatymyzdy aıamaı, ózimizge júktelgen mindetterdi tyńǵylyqty oryndaý ústindemiz. Búgin birneshe eldiń basshylary keldi jáne biz olardyń qaýipsizdigin qamtamasyz etýge baǵyttalǵan mindetterdi atqaryp jatyrmyz. Osyndaı aýqymdy da tarıhı is-sharada qyzmet etý biz úshin mártebe ári jaýapty mindet, — deıdi Ulttyq ulan Bas qolbasshylyǵy jaýyngerlik qyzmet bas basqarmasy bastyǵynyń orynbasary polkovnık Serik Narymbekov.

Ulttyq ulan sammıt ótkizý kezeńinde yqtımal quqyq buzýshylyqtardyń aldyn alý jáne quqyqtyq tártipti saqtaý úshin qyzmet atqarýdyń kúsheıtilgen nusqasyna aýystyryldy. Ulandyqtar kúndiz-túni kezekshilik etip, qalanyń negizgi aýdandary men is-sharalar ótetin oryndardy kúzetip tur. 

Qazirgi ýaqytta elordalyq bes aýdanda qoǵamdyq tártipti qorǵaý qyzmetine eki aýysymda Astana, Qaraǵandy, Pavlodar, Kókshetaý jáne Temirtaý qalalarynan 1000-nan astam Ulttyq ulan áskerı qyzmetshisi jumyldyrylǵan.

«Birinshi aýysymdaǵy qyzmet saǵat 12:00–den 18:00–ge deıin 40 jaıaý patrýldeý baǵyttarynda júzege asyrylady. Onyń ishinde derbes-26, polıtsııa qyzmetkerlerimen birlesken-14 jáne 2 avtokólik baǵyty bar. Ekinshi aýysymdaǵy qyzmetke saǵat 18:00–den tún ortasyna deıin patrýldeýdiń 220 jaıaý baǵyty qoıylady. Onyń ishinde derbes — 266, polıtseılermen birlesken-14, sondaı-aq 13 avtokólik baǵyty qarastyrylǵan», — delingen habarlamada. 

Shanhaı Yntymaqtastyq Uıymy búginde quramyna toǵyz múshe: Qytaı, Reseı, Qazaqstan, Qyrǵyzstan, Tájikstan, Ózbekstan, Úndistan, Pákistan jáne Iran kiretin iri halyqaralyq birlestik. Sonymen qatar, uıymda úsh baqylaýshy jáne 14 dıalog seriktesi bar.

ShYU-nyń negizgi maqsaty — saıası, saýda-ekonomıkalyq, ǵylymı jáne mádenı salalardaǵy yntymaqtastyqty nyǵaıtý. Uıym sonymen qatar aımaqtaǵy beıbitshilikti, qaýipsizdik pen turaqtylyqty birlesip qamtamasyz etýge kóp kóńil bóledi.

Bizdiń elimiz úshin ShYU sammıtin ótkizý — halyqaralyq qoǵamdastyq tarapynan joǵary dárejedegi senim men qurmettiń aıǵaǵy bolyp tabylatyn mańyzdy oqıǵa. ShYU-nyń belsendi qatysýshysy retinde Qazaqstan óńirlik yntymaqtastyqty damytýda jáne múshe memleketter arasyndaǵy baılanystardy nyǵaıtýda mańyzdy ról atqarady.

Ulandyqtardyń osyndaı aýqymdy is-sharanyń qaýipsizdigin qamtamasyz etýge qatysýy — olardyń kásibıligin arttyryp qana qoımaı, Qazaqstan Respýblıkasynyń halyqaralyq ımıdjin nyǵaıtady.

Qazaqstan Respýblıkasynyń Ulttyq ulany Qazaqstan Respýblıkasynyń Іshki ister organdarynyń biryńǵaı júıesine kiredi jáne jeke adamnyń, qoǵamnyń jáne memlekettiń qaýipsizdigin qamtamasyz etýge, adam men azamattyń quqyqtary men bostandyqtaryn qylmystyq jáne ózge de quqyqqa qarsy qol suǵýshylyqtardan qorǵaýǵa arnalǵan.