Ulan Rysqul: Іnim ekeýmiz fınalda jolyqsaq, tosyn jańalyq kútińizder

ASTANA. QazAqparat - 2 shilde kúni elorda tórinde «Qazaqstan Barysy» týrnıri ótedi. Balýandar dúbirli dodaǵa qyzý daıyndyq ústinde. Bıylǵy bas júldeden úmitkerlerdiń biri, jarystyń kúmis jáne qola júldegeri, tuńǵysh «Qazaqstan Barysy» Ulan Rysqulmen suhbattasyp qaıtqan edik.

- Ulan sizdi halyq tuńǵysh «Qazaqstan Barysy» retinde jaqsy tanıdy. Biraq sol alǵashqy jeńisińizden keıin sizdi jankúıerlerińiz jeńis tuǵyrynan kórmeı ketti. Nege?

- Sporttyń ózi jeńis pen jeńilisten turmaı ma?! Birde baǵyń shapqanmen birde babyń shappaı qalady. Keıde oılamaǵan jerden sátsizdikke jol beresiń. Iá, alǵashqy jyly juldyzym ońynan týdy. Kelesi jyly júldege ilige almadym. Odan keıingi jyly jaraqatyma baılanysty qatysa almadym. Odan keıingi jarystarda bir jyly Erjan Shynkeevke jol bersem, bir jyly Beıbit Ystybaevqa utyldym.

- Endi bıyl sol olqylyqtardyń orny tola ma?

- Sol úshin jattyǵý jasap jatyrmyn. Endi bir márte «bas beldikke» qol jetkizip jatsam ol jaman ba?! Buıyrtqanyn kóremiz ǵoı.

- Basty qarsylastaryńyzdy atap ótseńiz...

- «Qazaqstan Barysyna» álsiz bálýandar keledi dep oılamaımyn. Bir oblystan iriktelgen eń myqty eki balan keledi. Olar da ózimiz sııaqty «jeńsem, utsam» degen maqsatpen, jigermen keledi. Sondyqtan qaı balýanmen jolym túıisse de ońaı qarsylas joq. Onyń ústine ózderińiz de baıqap júrgen bolarsyzdar, sońǵy jyldary jas balýandardan nebir myqtylar shyǵyp jatyr. Bul qazaq kúresiniń joǵary qarqynmen damyp kele jatqanyn bildiredi. Óz basym bıyl úzdik úshtikten kórinsem de jaman bolmas edi dep oılap júrmin.

- Keshe inińiz Rýslannan da  suhbat alyp edik. «Aǵańmen jolyǵyp qalsań qaıter edińiz» degen suraqty qoıǵanbyz. Osy suraqty sizgede qoısaq...

- Qıyn suraq eken. Eger jolyǵyp jatsaq, bir jónin keltirermiz.

- Ózińiz alǵash «Barys» atanǵan jyly inińiz sizge jol berdi. Múmkin bıyl inińiz ekeýińiz fınalda jolyǵyp jatsańyzdar siz oǵan jol berersiz?

- Sońǵy eki balýan qalǵansha jolymyz túıispese keremet bolar edi. Al fınalda jolyǵyp jatsaq, onda tosyn jańalyq kútińizder. Birimiz Almaty qalasynan, endi birimiz Almaty oblysynan shyǵyp jatqannan keıin ekeýmizdiń de artymyzda úmit kútken el bar ekenin jaqsy bilemiz. Eger bir qalanyń ne bir oblystyń atynan synǵa túskende bir-birimizge oılanbaı jol berer edik.

- Áńgimeńizge rahmet!

Aıta keteıik, keshe Ulan Rysquldyń týǵan inisi Rýslan Ábdirazaqovtan suhbatymyzdy oqyrman nazaryna usynǵan edik.

Onda ol «aǵań ekeýiń bıylǵy dodada joldaryń túıisip qalsa ne ister edińiz?» degen suraǵymyzǵa  fınalǵa deıin joldary túıispeýin Alladan tilep júrgenin aıta kelip, «bul týrnır jalaýyn jelbiretken alǵashqy jyly Ulan maǵan qaraǵanda babynda boldy. Onyń ústine, qazaqy tárbıe alyp óskendikten, aǵamnyń joly úlken ekenin túsindim. Sondyqtan, oǵan jolymdy berdim. Fınalda jolyǵyp jatsaq, meniń óz tusynda jasaǵan inilik qurmetimdi bul joly aǵalyq izetimen qaıtaratyn shyǵar dep oılap qoıamyn», - dep inilik kóńilin bildirgen edi.