Ýltramarafonshy Zańǵar Álkenov Rekordtar kitabyna endi

NUR-SULTAN. QazAqparat – Ýltramarafonshy, QR Qarýly Kúshteriniń áskerı qyzmetshisi Zańǵar Álkenov Qazaqstannyń Rekordtar kitabyna endi, dep habarlaıdy QazAqparat.

Z.Álkenov 2020 jyldyń qyrkúıek aıynda 1,5 táýlik boıy toqtamastan júgirip, 200 shaqyrymdy quraıtyn «Qaraǵandy-Jańaarqa» baǵytyn 35 saǵat 12 mınýtta eńsergen bolatyn.

«Qaraǵandy garnızony áskerı polıtsııa bóliminiń anyqtaý jáne izdestirý bólimshesiniń ofıtseri kapıtan Zańǵar Álkenov Qarýly Kúshterdiń áskerı qyzmetshileri arasynda alǵashqy bolyp Qazaqstannyń Rekordtar kitabyna kirip otyr», - dep málim etti QR Qorǵanys mınıstrliginiń baspasóz qyzmetinen.

Osy kúnderi áskerı qyzmetshi taǵy bir ýltramarafonǵa daıyndalýda. Bul jolǵy meje – 320 shaqyrym. Start 7 mamyrǵa josparlanǵan. Marafondy GPS-navıgator arqyly onlaın rejıminde baqylaýǵa bolady.

«Bári jaqsy deńgeıde ótedi dep oılaımyn. Eger bul marafon men úshin tabysty bolsa, kelesi jyly Qaraǵandy - Almaty baǵyty boıynsha 1 000 shaqyrym júgirýdi josparlap otyrmyn», - deıdi Zańǵar Álkenov.

Aıta keteıik, Z.Álkenov qazaq kúresinen sport sheberi, dzıýdodan sport sheberine úmitker. 2012 jyly jaraqat alǵannan keıin jekpe-jek ónerin uzaq qashyqtyqqa júgirýge almastyrdy.