Ýltramarafonshy Zańǵar Álkenov 320 shaqyrymdy 45 saǵatta júgirip ótti

QARAǴANDY. QazAqparat - Qarýly Kúshterdiń ýltramarafonshysy jańa rekord ornatty, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Qaraǵandy garnızonynyń áskerı polıtsııa ofıtseri, kapıtan Zańǵar Álkenov 45 saǵatta «Jezqazǵan – Jańaarqa» baǵyty boıynsha 320 shaqyrym qashyqtyqty júgirip ótti.

Ol 27 mamyrda Jezqazǵan qalasynan bastap, 29 mamyrda týǵan jeri Jańarqa aýdanynda belgilengen ýaqyttan úsh saǵat buryn marafondy aıaqtady.

– Men úshin ár marafon - beriktikti synaý. 320 shaqyrym qashyqtyqty baǵyndyrǵanda óz múmkindikterimdi taǵy shyńdap kórdim. Bul men úshin ońaı bolmaǵanyn moıyndaımyn, – dep bólisti áskerı qyzmetshi.

Atalmysh marafon navıgatsııalyq platforma kómegimen, onyń baǵyty men araqashyqtyqty, ótý ýaqyty onlaın rejımde baqylandy.

Kapıtan Zańǵar Álkenov – qazaq kúresinen sport sheberi jáne dzıýdo men sambodan sport sheberine úmitker.

Onyń baǵyndyrǵan alǵashqy qashyqtyǵy 15 shaqyrym, sodan keıin – 21, 42, 75, 83-ke jetti. Ótken jyldyń qyrkúıeginde áskerı qyzmetshi 35 saǵat 11 mınýt 52 sekýndta 200 shaqyrymdy júgirip ótken.

Bul júgirýdi áskerı qyzmetshi Qazaqstan Táýelsizdiginiń 30 jyldyǵyna jáne Qarýly Kúshterdegi áskerı polıtsııa organdarynyń qurylǵanyna 24 jyl tolýyna arnady.

Eske sala keteıik, biz buǵan deıin ýltramarafonshy Zańǵar Álkenovtiń Qazaqstannyń Rekordtar kitabyna engenin jazǵan edik.