UQShU PA delegatsııasy Qazaqstandaǵy saılaýǵa qatysty pikir bildirdi

ASTANA. QazAqparat – Ujymdyq qaýipsizdik týraly shart uıymy Parlamenttik Assambleıasynyń baıqaýshylary Qazaqstandaǵy saılaýǵa qatysty pikir bildirdi, dep habarlaıdy QazAqparat tilshisi.

«Biz keshe jáne búgin saılaýdy uıymdastyrý protsesin qarap otyramyz. Biz úderisterge qatysyp jatqan barlyq saıası kúshtermen kezdesýler ótkizdik. Biz úmitkerlerdiń shtabynda boldyq, túrli qurylymdarmen kezdestik. Búgin tańerteń saılaý ýchaskelerinde UQShU baıqaý toby da jumysyn bastady. Osy oraıda daýys berýshilerdiń kóptigin atap ótkimiz keledi. Daýys berý rásimderi jaqsy uıymdastyrylǵanyn atap ótken jón. Biz barlyq oqıǵalarǵa muqııat qarap otyrmyz. Bizdiń oıymyzsha, saılaýdan keıin Qazaqstan halqy bul úderisten nyǵaıyp shyǵady. Jalpy, bul saılaý Qazaqstan halqy úshin mańyzdy dep sanaımyn», - dedi UQShU Parlamenttik Assambleıasynyń top úılestirýshi Vagarshak Akobıan elordadaǵy Halyqaralyq baıqaýshylarǵa qolǵabys kórsetý ortalyǵyndaǵy brıfıngide.

Óz kezeginde UQShU Parlamenttik Assambleıasynyń jaýapty hatshysy Sergeı Pospelov búgin tańerteń saılaý ýchaskeleri ashylǵanǵa deıin daýys berýshiler qatarynan shaǵyn kezekter bolǵanyn aıtty.

«Qazirgi ýaqytta biz eshqandaı zań buzý derekterin tirkegen joqpyz, ýchaskeler jabylǵansha jumysty jalǵastyramyz. Daýystardy sanaý kezinde de bizdiń baıqaýshylar qatysady. Sondaı-aq búgin keshke saılaýǵa qatysty ózimizdiń qorytyndyny qujatymyzdy qabyldaıtyn bolamyz», - dedi S. Pospelov.